Повеќе од 24.000 тони хуманитарна помош на ОН пристигнаа во Газа од почетокот на прекинот на огнот, објави денес заменик-специјалниот коорвдинатор на ОН за палестинските територии, Рамиз Алакбаров, и ги повика невладините организации да се вклучат во дистрибуцијата на помошта.
„Од почетокот на прекинот на огнот, доставивме повеќе од 24.000 тони помош преку сите гранични премини и ја рестартиравме дистрибуцијата на помош и до заедниците и до индивидуалните домаќинства“, рече Алакбаров, објави „Тајмс оф Израел“.
Иако обемот на помош е значително поголем во споредба со периодот пред примирјето, хуманитарците сè уште се соочуваат со недостаток на средства, според ОН, забележувајќи дека има и проблеми во координацијата со израелските власти.
Регионалниот директор на Светската програма за храна за Блискиот Исток, Самер Абделџабер, додаде дека во текот на 20-дневната интензивна дистрибуција од почетокот на прекинот на огнот во Газа, собрани се околу 20.000 тони храна.
