Бродови на Светската хуманитарна флотија испловија од Барселона и Џенова кон Појасот Газа, носејќи околу 300 тони храна и лекови. Десетици мали и средни бродови се очекува да пристигнат до границата на израелските води средината на септември, во досега најголемиот обид да се пробие поморската блокада на Газа која трае веќе 18 години.
Флотијата, составена од јахти и бродови со хуманитарна помош и активисти, започна патување долго 4.000 километри низ Средоземното Море. Конвојот вклучува делегации од над 40 земји, а во наредните денови ќе му се приклучат и бродови од Тунис и Италија.
Масовна поддршка и пораки од цел свет
Илјадници луѓе се собраа на пристаништето во Барселона за да ги испратат бродовите. Палестински знамиња и скандирања „Слободна Палестина!“ и „Бојкотирај Израел!“ го одбележаа испраќањето на флотијата.
Меѓу учесниците е и шведската активистка Грета Тунберг, која и претходно се обиде да стигне до Газа. Во јуни годинава, израелската морнарица ја задржа и депортираше кога патуваше со едрилицата „Мадлин“ заедно со уште 11 активисти.
На прес-конференцијата пред испловувањето, ирскиот актер Лијам Канингем (познат по улогата во „Game of Thrones“) пушти снимка од девојче по име Фатима, кое пее додека планира сопствена погребна церемонија.
„Во каков свет живееме, кога деца од пет-шест години размислуваат за сопствени погреби? Затоа сум јас тука, и затоа оваа флотија е важна“, рече Канингем.
Состојбата во Газа – катастрофална
Во последните недели, Израел ја засили офанзивата врз градот Газа. Според извештаи на хуманитарни организации, над половина милион луѓе во регионот се соочуваат со катастрофални услови и глад.
Активистите од иницијативата Global Sumud Flotilla бараат безбеден хуманитарен поморски коридор до Газа – дури и ако е само симболичен. Името на флотијата – SUMUD – е палестински збор што означува „пркос“ и „истрајност“.
