Фондацијата „Фросина Кулакова“, основана од семејството на трагично починатата Фросина, официјално го најавува своето отворање со донаторска вечер и хуманитарна аукција под наслов „THREADS OF LIGHT“, која ќе се одржи на 29 јануари во Станица 26 во Скопје.
Фондацијата е формирана со цел да развива долгорочни и системски решенија за подобрување на безбедноста во сообраќајот, подигнување на јавната свест и обезбедување психосоцијална и правна поддршка за семејствата погодени од сообраќајни трагедии. Преку едукација, застапување, кампањи за општествена одговорност и директна помош, Фондацијата настојува личната загуба да се трансформира во јавна мисија со конкретно општествено влијание.
Во тој контекст, упатен е јавен повик до уметници и креативци од различни области да се вклучат во хуманитарната аукција. На настанот ќе бидат застапени различни форми на уметничко и креативно изразување – од сликарство, скулптура и фотографија, до модни парчиња, дизајнерски предмети, мебел, светлосни објекти, инсталации и уникатни рачни изработки.
Во рамки на програмата ќе биде одржана и изложба, а ќе биде промовирана и химната на Фондацијата „Фросина Кулакова“. Посебен сегмент од вечерта ќе бидат модни парчиња инспирирани од цртежите на Фросина Кулакова, реализирани од нејзини колеги и професори од матичниот факултет, како симболично продолжување на нејзиниот творечки дух преку колективна уметничка акција.
Средствата собрани преку аукцијата ќе бидат наменети за сите програмски активности на Фондацијата – вклучително и психосоцијална и правна поддршка за семејствата погодени од сообраќајни несреќи, кампањи за подигнување на јавната свест за сообраќајната безбедност, како и иницијативи за унапредување на законската рамка и институционалната заштита на жртвите.
Од Фондацијата посочуваат дека сообраќајните трагедии не завршуваат со самиот настан, туку оставаат долготрајни последици врз семејствата и заедницата. Според нив, токму уметноста може да биде простор за дијалог, солидарност и општествена одговорност, но и алатка за поттикнување на системски промени.
Сите заинтересирани уметници и креативци можат да се пријават со испраќање порака на Instagram профилот на Фондацијата, со фотографија од делото, краток опис и предложена почетна минимална донација.
Од Фондацијата упатуваат апел за широка поддршка и активно учество, нагласувајќи дека безбедноста во сообраќајот е заедничка одговорност и дека секој придонес е чекор кон спречување на идни трагедии.
