Во ерата на сѐ поскапите летни дестинации, каде квалитетот сѐ почесто го губи трката со масовноста, една медитеранска земја тивко и сигурно ја освои Европа – и светот. Хрватска, некогаш скриениот бисер на Јадранот, денес е официјално прогласена за најдобра европска туристичка дестинација за 2025 година.
Ова признание, добиено преку гласовите на над милион патници ширум светот, ѝ беше доделено на Хрватска на престижниот саем ITB во Берлин, најголемиот туристички саем во светот. Но, зад наградата стои приказна за стратегија, упорност, и – многу љубов кон земјата што има сѐ: море, планини, историја, вино и гастрономија.
Од Сплит до Истра – едно големо „да“ од светот
„Хрватска не е само дестинација – тоа е искуство“, напиша New York Post, опишувајќи ја земјата како совршен микс на авантуристички туризам, култура и вкус.
Годинава, според податоците од Државниот завод за статистика, туристичките бројки го потврдуваат тоа со бројки што не можат да се игнорираат. Во април 2025: 1,2 милиони туристи и 3,3 милиони ноќевања – рекорден пораст од 18,4% во однос на истиот месец минатата година. Во првите четири месеци од 2025: над 5,6 милиони ноќевања – пораст од 4,7% во споредба со 2024. Германците, Австријците, Италијанците и Словенците – ги преплавуваат плажите на Истра и Далмација, при што германските туристи оствариле 48% повеќе ноќевања во април. Најатрактивна дестинација за нив е Истра, со 234.000 ноќевања, што е 74,5% раст. Германските туристи сочинуваат 18,9% од сите странски ноќевања, а Истра е водечка со 997.000 ноќевања во април.
„Тука е тивко, вкусно, топло и автентично. А и поевтино од Грција или Шпанија“, изјави Брајан Кели, основач на The Points Guy.
Хрватска годинава доминира не само во текот на летото, туку и во пред-сезоната. Уште во мај, земјата бележи 6,6 милиони ноќевања. Туристичките статистики покажуваат дека 85,5% од сите ноќевања се од странски гости, со раст и кај домашните туристи. Најпосетувани региони остануваат Истра, Далмација и Дубровник, а луката во Дубровник е најпосетена круизна дестинација во земјата, со 110 пристигнувања до мај 2025.
„Имаме совршен баланс помеѓу масовен туризам и одржливост“, изјавуваат од Хрватската туристичка заедница, додавајќи дека земјата вложува сѐ повеќе во гастрономија, рурален туризам и зелени дестинации.
Што ја прави Хрватска посебна?
Морска линија од 1.800 км со над 1.200 острови – од кои само 50 се населени. Заштитено културно наследство: Стариот град во Дубровник, катедралите во Шибеник и Сплит, и римските остатоци во Пула. Наследство од три култури – медитеранска, средноевропска и балканска. Формула на совршена цена и квалитет – според германските медиуми, Хрватска е најконкурентна дестинација на пазарот во 2025 година.
Само во првите пет месеци, 45 странски крузери пристигнале во хрватските пристаништа, реализирајќи над 151 патување – што е пораст од 4,9%. Туристите сѐ повеќе го комбинираат одморот со морски авантури и посети на повеќе градови, особено преку Сплит- Задар- Корчула.
Хрватска ја живее својата туристичка ренесанса
Хрватска не само што ја освои титулата најдобра европска дестинација за 2025, туку и ја потврди својата позиција како туристичка сила со глобален углед. Со рекорден раст, силна присутност на ITB Berlin и стратегија за одржлив развој, Хрватска е пример за успешен туризам во време на економска неизвесност.
2025 е година на туристички врвови за Хрватска – не само според бројките, туку и според импресиите на милиони патници. Земјата успеа да направи премин од „пристапна алтернатива“ до дестинација од прва лига. Сега не е само место за одмор – туку мора да се посети, велат глобалните медиуми.
