Забраната за употреба на мобилни телефони во холандските училишта, и покрај првичните протести, довела до подобрено учење и односи со учениците, според истражување нарачано од холандската влада од Институтот Конштам.
Националните упатства, воведени во јануари 2024 година, препорачуваат целосна забрана за телефони во училниците, а речиси сите училишта ги почитувале. Околу две третини од средните училишта бараат од учениците да ги остават своите телефони дома или да ги заклучуваат во шкафчиња, додека едно од пет училишта ги собира телефоните на почетокот на часот.
Во истражувањето беа анкетирани директори на 317 средни и 313 основни училишта, а беа организирани и фокус групи со наставници, помошен персонал, ученици и родители. Три четвртини од средните училишта изјавиле дека учениците сега полесно обрнуваат внимание, 59 проценти забележале подобрување во социјалната атмосфера, додека 28 проценти пријавиле подобрување во резултатите во училиштето.
Д-р Александар Крепел од Институтот Конштам истакнува дека меѓучовечките односи меѓу учениците се најмногу подобрени.
„Веќе не е можно тајно да се фотографира некого во училницата и да се проследи во WhatsApp група, па затоа социјалната безбедност е поголема. Особено за време на паузата помеѓу часовите, кога порано сите беа на своите телефони, сега се принудени да разговараат едни со други. Можеби се караат малку почесто, но училиштата, наставниците и учениците генерално се задоволни бидејќи атмосферата е подобра“, рече тој.
Фреја Сиксма, портпаролка на Советот за средно образование (VO-raad), вели дека почетните стравови се покажале како неосновани.
„На почетокот имаше голем отпор, од училиштата, наставниците, учениците и родителите, сите поставуваа прашања за тоа како ќе функционира. Но, сега гледаме дека, всушност, сите се доста задоволни“, рече таа.
Истражувањето покажа дека дури и во специјализираните училишта, каде што телефонот може да се користи како помошно средство во учењето, во половина од случаите училиштата ја оцениле забраната како позитивна или многу позитивна мерка. Во основните училишта, телефоните немале толку големо влијание дури ни порано, но четвртина од училиштата наведуваат дека ефектот од забраната бил корисен.
Министерката за основно и средно образование Мариел Пол оцени дека националните упатства помогнале во зајакнувањето на редот во училницата.
„Наставниците и директорите посочија дека ако само еден наставник сака да забрани телефони во својот час, тоа секогаш ќе биде предмет на дискусија. Особено помалку искусните наставници тешко се справуваа со тоа“, рече таа.
Според холандската статистика, дури 96 проценти од децата користат интернет секој ден, најчесто преку мобилни телефони. Минатиот месец, технолошката влада им препорача на родителите да ги забранат социјалните медиуми за деца под 15 години и да го ограничат времето поминато пред екран, додека еден пратеник предложи општа забрана за паметни телефони во училиштата.
