Лидерот на либанскиот шиитски движење Хезболах, Наим Касем, изјави дека организацијата го задржува целосното право да одговори на убиството на својот висок воен командант, Хајтам Али Табатабаји, кој минатата недела беше убиен во израелски воздушен напад врз јужните предградија на Бејрут – традиционално упориште на проиранската група.
Во говор емитуван на телевизијата Ал Манар, Касем го опиша нападот како „очигледен чин на агресија“ и порача дека Хезболах сам ќе го определи моментот кога ќе возврати:
„Нека израелскиот непријател го толкува ова како што сака… Нашето право е да одговориме, а ние ќе решиме кога тоа ќе се случи,“ нагласи тој.
Хезболах посочува дека веќе една година го почитува примирјето со Израел, со кое беше завршен нивниот последен конфликт. Табатабаји, според организацијата, бил убиен додека се среќавал со своите помошници за подготовка на „идни акции“ на движењето.
Убиството на овој високорангиран командант е најтешкиот удар врз групата од крајот на војната во ноември 2024 година, кога Израел елиминираше повеќе раководни фигури на Хезболах, меѓу кои и неговиот долгогодишен лидер Хасан Насралах.
Нападот доаѓа во период на засилени израелски операции врз либанска територија, и покрај важечкото примирје. Израел тврди дека ги таргетира членови на Хезболах и нивната инфраструктура, обвинувајќи го движењето дека повторно се вооружува – тврдење што Хезболах го отфрла.
Во понеделникот, Иранската револуционерна гарда исто така повика на „одмазда“ за смртта на Табатабаји, сигнализирајќи потенцијално ново заострување на тензиите во регионот.
Извор: N1info.rs
