Ози Озборн почина дома, опкружен со своето семејство, на 22 јули на 76-годишна возраст, само неколку недели по својот проштален концерт во Бирмингем. Според обдукцискиот извештај, до кој дојде New York Times, легендарниот „Принц на темнината“ починал од срцев удар.
Сертификатот ја наведува причината за смрт како: Срцев застој кој се случил надвор од болница, акутен инфаркт на миокардот, болест на коронарната артерија и ) Паркинсонова болест со автономна дисфункција како заеднички причинители.
Поранешниот фронтмен на Black Sabbath беше дијагностициран со Паркинсонова болест во 2003 година.
Кариера полна со контроверзи и легендарен статус на Ози Озборн
Облечен во црно или гол до половина, Озборн често беше мета на родителски групи поради неговиот мрачен имиџ, а еднаш предизвика голем скандал кога откина глава од лилјак на сцена.
Подоцна, преку реалното ТВ шоу „The Osbournes“, тој се покажа како малку збунет, но сладок татко.
Дебитантскиот албум на Black Sabbath од 1969 година често се споредува со “Големата експлозија” на хеви металот – мрачен, моќен и бунтовен, со слика на злокобна фигура на насловната страна.
Следниот албум, „Paranoid“, вклучува метал класици како „War Pigs“, „Iron Man“ и „Fairies Wear Boots“. Насловната песна „Paranoid“ стана препознатлив хит и достигна топ 10 во многу европски држави.
Овие два албума беа изгласани меѓу најдобрите 10 хеви метал албуми на сите времиња од читателите на Rolling Stone.
Почит и последна прошетка
На 30 јули 2025, илјадници фанови излегоа на улиците на Бирмингем за да му оддадат последна почит, положувајќи цвеќиња на клупата „Black Sabbath Bench“ додека погребната поворка минуваше низ градот.
„Black Sabbath се Beatles на хеви металот. Секој што навистина го сака металот ќе ви каже – сè почнува од Sabbath“, напиша Дејв Наваро од Jane’s Addiction во Rolling Stone во 2010 година.
По заминувањето од Black Sabbath во 1979 поради ексцеси (доцнење, откажани настапи), Озборн се враќа како соло ѕвезда со албумот „Blizzard of Ozz“ (1980) и потоа „Diary of a Madman“ – и двата достигнуваат мулти-платинум статус, со хитови како „Crazy Train“, „Goodbye to Romance“ и „You Can’t Kill Rock and Roll“.
Тој беше двапати воведен во Rock & Roll Hall of Fame: во 2006 година со Black Sabbath и во 2024 како соло изведувач.
Во јули 2025 година, оригиналниот состав на Black Sabbath се обедини за првпат по 20 години за проштален концерт во Велика Британија, каде Озборн изјави пред 42.000 фанови:
„Нека започне лудилото!“
