Растот на цената на хелиумот повторно го отвори прашањето колку се подготвени здравствените системи за прекини во снабдувањето. Овој гас кој најчесто во секојдневието се поврзува со балони, но во пракса е клучен за магнетна резонанца, индустрија и производство на чипови.
Фондот за здравствено осигурување деновиве ги предупреди болниците да ги проверат резервите на хелиум, токму во момент кога глобалниот пазар е под нов притисок. Причината е нарушеното производство во Катар, еден од најважните светски извори на хелиум, поради што цените веќе нагло пораснаа, а дел од испораките станаа понеизвесни.
Хелиумот е особено важен во медицината затоа што се користи за ладење на магнетите во MRI апаратите. Според американскиот USGS, магнетната резонанца е меѓу најголемите области на потрошувачка на хелиум, додека и производителите на MRI системи потврдуваат дека класичните апарати користат значителни количини течен хелиум за да функционираат.
Но употребата не запира во болниците. Хелиумот се користи и во производство на полупроводници, оптички влакна, заварување, лаборатории, воздушна и вселенска индустрија, како и во разни инженерски и технолошки процеси. USGS наведува дека голем дел од побарувачката доаѓа токму од аналитички и специјални гасови, MRI, како и од контролирани атмосфери, фибер-оптика и полупроводници.
Затоа цената на хелиумот е важна токму сега. Reuters објави дека по нарушувањето на производството во Катар, спот-цените веќе се удвоиле, а индустријата предупредува дека ако кризата потрае уште неколку недели, може да се почувствуваат последици и во здравството и во технолошкото производство. Associated Press дополнително потсетува дека Катар обезбедува околу 30 проценти од светското производство на хелиум, па секој застој таму веднаш се прелева на глобалниот пазар.
Во пракса, тоа значи дека хелиумот не е само индустриска суровина, туку дел од инфраструктурата без која тешко функционираат и дијагностиката и современата технологија. Ако нестабилноста на пазарот продолжи, првиот удар нема да се види само во ценовниците, туку и во притисокот врз болниците и компаниите што зависат од редовно и сигурно снабдување
