Снимањето на серијата Хари Потер започна на 14 јули 2025 година во Warner Bros. Studios Leavesden, истата локација каде што беа реализирани и филмовите. Серијата е во продукција на HBO и Warner Bros. Discovery, а премиерата е најавена за 2027 година.
Зелено светло за серијата беше дадено во април 2023 година, а концептот предвидува секоја сезона да обработува по една книга, со најавен „децениски“ проект. Од Warner Bros. Discovery наведоа дека станува збор за верна адаптација на оригиналните романи, со целосно нова актерска постава.
По објавувањето на првата официјална фотографија од шкотскиот актер Доминик Маклафлин во улогата на Хари Потер, реакциите на социјалните мрежи беа мешани – од носталгично воодушевување поради враќањето во Хогвортс, до скепса околу потребата од нова адаптација на веќе култната приказна.
Новата актерска екипа
HBO претходно потврди дека секоја сезона ќе следи по една книга од серијалот, со целосно нова актерска постава. Покрај Маклафлин како Хари Потер, Арабела Стентон ќе ја толкува Хермиона Грејнџер, а Аластер Стаут е новиот Рон Визли. Серијата е замислена како долгорочен проект со најавени седум сезони.
Реакции од оригиналните актери
По објавувањето на новата „златна тројка“, се огласија и дел од актерите од оригиналната филмска франшиза. Даниел Редклиф, кој го играше Хари Потер во филмовите, изјави дека лично му испратил писмо на Маклафлин.
„Само сакав да му посакам да си помине прекрасно и да има уште подобро искуство од моето. Тие деца изгледаат навистина млади, и тоа е и лудо и многу слатко“, изјави Редклиф во телевизиско интервју, додавајќи дека не сака да биде „сенка“ во нивниот процес, туку поддршка од дистанца.
И другите членови на оригиналната актерска екипа јавно изразија поддршка за новата генерација, оценувајќи дека приказната има простор за ново читање и подлабока серијска форма.
Foto: Aidan Monaghan/HBO
Поделени реакции од јавноста
Додека дел од фановите ја поздравуваат можноста книгите да бидат подетално обработени во телевизиски формат, други ја изразуваат загриженоста дека серијата ќе биде постојано споредувана со филмовите. Сепак, од HBO нагласуваат дека станува збор за „верна адаптација на оригиналните книги“, а не за римејк на филмската верзија.
Серијата е планирана да трае седум сезони, со што HBO најавува едно од своите најголеми и најдолгорочни телевизиски вложувања.
