Тензиите на Блискиот Исток се одразија и врз спортските случувања. Израелскиот клуб Хапоел Тел Авив подготвува план за итна евакуација на своите кошаркари, домашни и странски, по новата ескалација на конфликтот меѓу Израел и Иран.
Двете земји се во отворена конфронтација од средината на јуни минатата година, а утринава повторно дојде до размена на ракетни напади. Поради безбедносната состојба, израелските власти го затворија воздушниот простор, што значително ја отежнува можноста за напуштање на земјата по воздушен пат.
Според информации на израелски медиуми, раководството на клубот разгледува алтернативни решенија, меѓу кои и евентуална евакуација по морски пат – со брод кон европска дестинација.
Безбедноста на играчите во моментов е апсолутен приоритет, додека спортските активности се ставени во втор план поради сериозноста на ситуацијата.
