Аеродромот Шипхол (Schiphol) во Амстердам е погоден од нови сериозни нарушувања, откако обилниот снег и силниот ветер предизвикаа голем колапс низ цела Холандија.
Според локалните медиуми, денеска се откажани уште 718 летови, а временските прогнози предупредуваат дека во некои области може да наврнат дополнителни до 10 сантиметри снег.
Од аеродромот Шипхол потврдија дека и понатаму важат строги ограничувања во воздушниот сообраќај, наведувајќи:
„Во среда, поради упорното зимско време и силниот ветер, можен е само ограничен воздушен сообраќај до и од Шипхол. Се очекуваат дополнителни откажувања на летови, претежно на европските линии.“
Илјадници патници останаа заглавени на аеродромот, додека авио-компаниите се обидуваат да се справат со последиците од временската непогода, која веќе неколку дена предизвикува сериозни проблеми во европскиот воздушен сообраќај.
