Целта е воспоставување стабилна, непартиска власт која ќе обезбеди основни јавни услуги во соработка со арапските земји и меѓународните институции. Планирано е да се формира и меѓународен комитет кој ќе го надгледува финансирањето и спроведувањето на обновата на Газа.
Во заедничката изјава е потенцирано дека сите страни се обврзуваат на почитување на договорот за прекин на огнот и на преземање мерки за одржување на безбедноста и стабилноста во целата територија. Нагласено е и единството на палестинскиот политички систем и потребата националните одлуки да се носат независно, без надворешен притисок.
Лидерот на Хамас во Газа, Халил ал-Хаја, изјави дека американскиот претседател Доналд Трамп потврдил дека војната е завршена и дека израелската окупација не ги постигнала своите цели по две години конфликти. Ал-Хаја нагласи дека Хамас нема приговори независни личности да управуваат со Појасот Газа и дека сите надлежности, вклучувајќи ги и безбедносните, ќе бидат предадени на новиот управен одбор.
Тој потврди дека постои консензус со Фатах за распоредување меѓународни сили кои ќе го надгледуваат примирјето и обновата на Газа под покровителство на Обединетите нации. Хамас, додаде, се залага за одржување избори со цел национално обединување и воспоставување на единствена власт. Ал-Хаја им порачал на американските посредници Стив Виткоф и Џеред Кушнер дека Хамас сака стабилност и дека, според него, Трамп е единствениот што може да ја ограничи израелската окупација.
Во однос на вооружувањето, тој изјави дека тоа прашање ќе биде решено кога ќе заврши окупацијата, а засега останува предмет на разговори меѓу палестинските фракции и посредниците. Хамас, рече, нема да донесува одлуки без национален консензус и бара уредување на основните државни документи, бидејќи Западниот Брег е под израелска контрола.
Ал-Хаја потврди дека Хамас ја прифаќа улогата на мировните сили на ОН за надзор на границите и прекинот на огнот, и дека приоритет е да се стави крај на страдањето на палестинските затвореници, иако израелската страна е непромислива по тоа прашање.
Турција исклучена од мисијата за стабилизација на Газа
Во меѓувреме, Турција ќе биде исклучена од планираната меѓународна мисија за стабилизација на Појасот Газа, во која треба да учествуваат околу 5.000 војници. Израел изразил противење на турското учество поради затегнатите односи и блиските врски на претседателот Реџеп Таип Ердоган со Хамас и Муслиманското братство.
Американскиот државен секретар Марко Рубио изјави дека составот на мултинационалните сили ќе зависи од одобрувањето на Израел, а нивната задача ќе биде да спречат безбедносен вакуум во периодот на обновата на Газа. Одлуката за исклучување на Турција предизвика полемики, со оглед дека Анкара е еден од гарантите на т.н. Трампов мировен план од 20 точки и располага со една од најсилните армии во регионот.
Извор: Vecernji.hr
