Специјалното обвинителство за корупција и организиран криминал (СПАК), соопшти дека на 12 март добило информација за незаконски упад во електронските адреси на неколку специјални обвинители, но оти „благодарение на безбедносните мерки, внатрешниот систем на СПАК останал недопрен“.
– Според проверките, упадот се случил само на електронските адреси на неколку обвинители и не влијаел на целокупниот ИТ систем на институцијата. Учесниците во овој чин успеале да добијат одредени информации, но не обезбедиле пристап до истражните досиеја. Се обидоа да го хакираат и мејлот на шефот на Специјалното обвинителство, Алтин Думани, но безуспешно, стои во соопштението на обвинителството.
Се додава дека по интензивна истрага, во кое било вклучено и Националното Биро за истраги и секторот за вештачења, во рок од 24 часа се идентификувани и приведени две лица: тој што го извршил упадот на електронската пошта и тој што ги дистрибуирал информациите на трети лица. Исто така, одземена е и опремата користена за овој чин и преземените датотеки.
– Внатрешната управна истрага, потврди дека целокупниот ИТ систем не претрпел никакви оштетувања, но се преземени дополнителни мерки за зајакнување на заштитните протоколи. Засега нема докази дека уапсените соработувале со персонал на СПАК, се наведува во соопштението.
Од друга страна дел од медиумите наведуваат дека хакерите, кои се албански државјани, еден од нив поранешен вработен во Управата за санкции, презеле датотеки и ги препратиле на разни адреси.
И лидерот на опозициската Демократска партија, Сали Бериша рече дека „хакерите стигнале до истражните досиеја, меѓу нив и неговото“.
