Корисниците на Гугл Мапс повеќе не можат да гo оценуваат Мексиканскиот залив во таа апликација, бидејќи компанијата Алфабет, сопственик на Гугл, ја укина таа опција по критиките за промената на името во „Американски залив“
Технолошката компанија го променила името во апликацијата за американските корисници откако претседателот Доналд Трамп наредил да се користи тоа име во официјалните документи.
Кога ќе се кликне на името на заливот во апликацијата, се појавува порака дека „коментарите се привремено исклучени“.
Гугл ги отстранил и постојните негативни коментари кои биле објавени по промената на името.
Од американската компанија ја оправдуваат одлуката со тоа што наводно „редовно ги заштитуваат местата кога очекуваат поголем број рецензии кои не се во согласност со темата или не го одразуваат личното искуство на таа локација“.
Компанијата така „тивко признала“ дека ги отстранила негативните оценки за заливот во овој случај, извештава списанието Форбс.
Корисниците на социјалните мрежи тврдат дека се отстранети стотици рецензии со една ѕвезда, обвинувајќи го Гугл за „цензура“. Сега најновата рецензија која се гледа во апликацијата Гугл Мапи за Мексиканскиот залив беше објавена пред еден месец.
Гугл во понеделникот објави дека корисниците во Америка од сега наместо Мексиканскиот залив на мапите ќе го видат „Американскиот залив“. Ова беше нашравено поради „долгорочната политика“ да се менуваат имињата на локациите во согласност со официјалните извори на американската влада.
Името за корисниците во Мексико ќе остане непроменето, а луѓето низ светот ќе го видат оригиналното име, додека „Американски залив“ ќе биде наведено во загради, соопштиле од Гугл.
Кон крајот на јануари мексиканската претседателка Клаудија Шејнбаум му пишала на Гугл и го замолила да не го менува името на заливот.
