Санторини, вулкански остров во Егејското Море, е потресен од десетици илјади благи земјотреси од крајот на јануари, принудувајќи илјадници луѓе да избегаат, а властите да ги забранат градежните активности и да ги затворат училиштата и околните острови.
Не се пријавени поголеми штети, но научниците велат дека сеизмичката активност била без преседан дури и во земја подложна на земјотреси како Грција, а не се исклучува ни можноста за посилен земјотрес.
Споед властите, главното пристаниште, кое се наоѓа во подножјето на стрмата падина е слаба врска, иако не е забрането за користење во итни ситуации.
Министерот за цивилна заштита Василис Кикилијас рече дека Грција ќе изгради пристаниште за евакуација за безбедно приклучување на патничките фериботи додека не се воспостави нова пристанишна инфраструктура.
„Заедно со новото пристаниште во Санторини, кое се подготвува, донесена е одлука за поставување на пристаниште за бегство на делот од островот каде што патничките фериботи ќе можат да се вкотват во итен случај“, рече тој во интервју за грчката телевизија АНТ1.
Иако потресите се намалија во текот на викендот, локалните власти во неделата ги продолжија вонредните мерки трета недела и ги повторија повиците до луѓето да се држат настрана од крајбрежните области и стрмните ридови подложни на лизгање на земјиштето.
„Оваа приказна не е завршена“, изјави Костас Папазахос, професор по сеизмологија.
„И властите и жителите треба да се навикнат на прилично непријатна ситуација некое време, тоа може да трае уште два, три месеци.“
Санторини ја добил сегашната форма по една од најголемите вулкански ерупции во историјата, околу 1600 година п.н.е.
Сеизмолозите велат дека најновата сеизмичка активност, резултат на подвижните тектонски плочи и магмата, ги турнала подземните слоеви на островот нагоре.
