Грција е „многу блиску“ до воведување забрана за користење социјални мрежи за деца под 15 години, потврди извор од грчката влада за Reuters. Најавата доаѓа во момент кога сè повеќе европски држави разгледуваат или воведуваат строги мерки за ограничување на пристапот на малолетници до дигитални платформи.
Паралелно со грчките најави, Шпанија објави дека планира забрана за социјални мрежи за деца под 16 години, при што директорите на интернет-платформите би можеле лично да одговараат за говор на омраза на нивните страници. Во Португалија, пак, во парламентот е поднесен предлог-закон со кој би се забранил пристап до социјалните мрежи за лица под 16 години без согласност од родителите.
Овие иницијативи се дел од поширок европски пристап кон технолошките компании, кои сè почесто се обвинуваат дека изложуваат деца на штетна содржина и дека нивните платформи се дизајнирани да создаваат зависност. Слични дебати веќе се водат во повеќе од дваесет земји, меѓу кои Франција и Велика Британија.
Во декември, Австралија стана првата земја во светот што воведе целосна забрана за користење социјални мрежи за деца под 16 години. Австралиската агенција за безбедност на интернетот соопшти дека технолошките компании веќе блокирале околу 4,7 милиони кориснички профили на малолетници.
Со најавените мерки, Грција се вклучува во растечкиот европски и глобален тренд за регулирање на дигиталниот простор со цел поголема заштита на децата и тинејџерите од ризиците на онлајн средината.
