Грција најави дека од 1 јануари 2027 година ќе воведе забрана за пристап до социјалните мрежи за сите деца под 15 години. Оваа одлука ја соопшти премиерот Киријакос Мицотакис, кој рече дека мерката е „тешка, но неопходна“ поради зголемената анксиозност, проблеми со спиењето и зависноста што ја создаваат платформите со дизајн на апликациите.
Мицотакис истакна дека науката јасно покажува дека долготрајното користење на социјални мрежи го оптоварува умот на децата и го нарушува нивното нормално растење и одмор. Тој изјави дека Грција ќе работи и на тоа оваа идеја да стане унифицирана политика на ниво на Европската унија, со цел да се воведе „дигитална возраст на полнолетство“ од 15 години во цела Европа.
Оваа забрана доаѓа набргу по друго силно ограничување во образовниот систем на Грција, каде што мобилните телефони беа забранети во училиштата, а беа воведени алатки за родителски контролa. Анкетите покажуваат дека околу 80% од граѓаните ја поддржуваат оваа мерка како начин да се заштитат децата од негативните ефекти на прекумерната дигитална изложеност.
Грција не е единствена земја што размислува за ваков чекор. Австралија веќе воведе забрана за деца под 16 години, а и други земји како Обединетото Кралство, Франција и Данска разгледуваат слични ограничувања, со цел да ја подобрат заштитата на најмладите на интернет.
Мерката сè уште треба официјално да биде вметната во законските рамки до средината на 2026 година, по јавни консултации и подготвување на системи за верификација на возраст. Грчките власти велат дека самостојните национални правила нема да бидат доволни без координирана акција на ниво на ЕУ.
