Познатиот патнички магазин Travel + Leisure организираше гласање за најдобриот остров во Европа, и – како што се очекуваше – повеќето омилени островски дестинации се наоѓаат во сончевиот Медитеран.
Дури пет од нив се во Грција, земја со илјадници острови расфрлани низ Егејското и Јонското Море, вклучително и победникот за оваа година – Парос.
Малото италијанско острово Искија се најде на второто место, а Хвар од Хрватска на третото.
„Трите победници на овогодишната листа носат чувство како да сте на крајот од светот, далеку од типичниот Медитеран, и нудат сосема различни пејзажи и доживувања“, наведува Travel + Leisure.
Интересно е што и Шкотска се појавува на листата со островите Скај и Хебриди, докажувајќи дека плажите облеани со сонце не се единствениот избор за патувања. Еден читател го опишал Скај како „непреоптоварено, прекрасно место за уживање во природата и тишината“.
„На Парос има изненадувања на секој чекор“
Иако Парос речиси секоја година се наоѓа на оваа листа, првото место го освои првпат од 2020 година, а некои читатели дури го опишале како најдобриот остров во светот.
Учесниците во анкетата ги истакнале свежите морски плодови, можностите за шопинг, природната убавина и топлото гостопримство на локалното население. Но, она што го издвојува Парос од другите е разновидноста на содржини и доживувања.
„Имаше многу повеќе за истражување отколку што очекував“, напишал еден читател. „Изненадувања на секој агол.“
И покрај тоа што е достапен со ферибот од Атина и други популарни острови, Парос останува малку познат меѓу македонските туристи, иако го нуди сето она поради што се сака Грција – бели куќички, тиркизно море, миризливи таверни и традиционален шарм.
Листа на 15 најдобри острови во Европа според Travel + Leisure:
- Парос, Грција – 96.50 поени
- Искија, Италија – 93.25
- Хвар и далматинските острови, Хрватска – 91.09
- Мадејра, Португалија – 89.93
- Маљорка, Шпанија – 89.54
- Крит, Грција – 89.49
- Милос, Грција – 89.11
- Азорски Острови, Португалија – 88.89
- Сардинија, Италија – 88.22
- Сицилија, Италија – 86.98
- Малта – 86.45
- Скај и Хебриди, Шкотска – 84.94
- Санторини, Грција – 84.67
- Корзика, Франција – 84.00
- Миконос, Грција – 82.87
