Грчката Национална галерија соопшти дека грчки пратеник нападнал четири слики на изложба во музејот во Атина, вклучително и една што претходно ја критикуваше како навредлива на верска основа.
По нападот, Националната галерија – Музејот Александрос Суцос беше затворена, а посетителите беа враќани назад.
Полицијата го приведе Николаос Пападопулос, од малата десничарска, ултра-религиозна партија Ники, која има 10 од 300 места во парламентот и по неколку часа го ослободи.
Пападопулос претходно во парламентот рече дека една од грчките слики е навредлива за православното христијанство, доминантната религија во Грција, тврдејќи дека ги навредува Богородица и Христос.
„Симнав четири икони, четири богохулни икони, а во две од нив … стакло се скрши, ништо друго“, им рече Пападопулос на новинарите откако беше ослободен. Тој рече дека делата на изложбата „ги навредуваат Дева Марија, Свети Ѓорѓи – архангелите кои во нашите домови бевме научени да ги обожаваме и почитуваме“.
Музејот издаде соопштение во кое се вели дека Пападопулос и уште едно лице ги нападнале сликите кои биле дел од изложбата на грчки уметници насловена „Привлечноста на бизарното“, фрлајќи ги на подот и кршејќи го стаклото од рамките. Во соопштението, одборот на директори на галеријата рече дека „безрезервно го осудува секој чин на вандализам, насилство и цензура што ја нарушува уставно загарантираната слобода на изразување“.
Изложбата вклучува дела – карикатури на религиозни икони и теми, а се одржува како придружба на изложбата од 80 гравури на шпанскиот мајстор Франциско Гоја.
