Градоначалникот на Загреб, Томислав Томашевиќ, остро го осуди славењето на „Независна Држава Хрватска“ и атмосферaта на закани во центарот на градот, откако синоќа група маскирани лица се собра пред Српскиот културен центар воочи отворањето на „Деновите на српската култура“.
„Загреб и Хрватска не се љубат со повикување на НДХ што донесе расни закони и системски убиваше луѓе по логори,“ напиша тој, додавајќи дека никој не смее да биде над законот.
Полицијата соопшти дека спречила можно противправно однесување во близина на просторот каде се отворала изложбата и најави анализа на сите достапни снимки. Според извештаите, собраните — облечени во црно, со капуљачи и маски — извикувале пароли, меѓу нив и „Хрватска, независна држава“ и „Зови, само зови“. Дел од медиумите јавија и за вербални напади кон две новинарки; загрепската полиција најави засилено присуство на идни настани на српската заедница за да се спречат инциденти.
Случајот се надоврзува на претходниот инцидент во Сплит, кога на 3 ноември маскирани мажи — меѓу кои и припадници на навивачката група „Торцида“ — го попречија отворањето на културна манифестација на српската заедница, со извикување на усташкиот поздрав „За дом спремни“. Девет лица беа приведени и им е одреден едномесечен притвор поради насилничко однесување и повреда на слободата на изразување на национална припадност
