Врховниот командант на вооружените сили на Украина, Олександр Сирски, изјави дека за Украина е прифатливо ограничување на големината на армијата на 800.000 припадници, оценувајќи дека таква бројка обезбедува одбрана на земјата во случај на продолжување на руската агресија, но и одржлив систем на мобилизација.
„Оваа бројка навистина гарантира одбивање на вооружена агресија доколку таа продолжи. Таа исто така гарантира плански процес на мобилизација. На почетокот ни беше понудено намалување на бројот на војници на 600.000, но ние сме задоволни со бројката од 800.000“, изјави Сирски во интервју за украинскиот Канал 24.
Тој додаде дека при носењето на оваа одлука се земале предвид реалните безбедносни потреби на државата и долгорочното планирање на одбраната.
„Руските планови не се остварија“
Говорејќи за состојбата на бојното поле, Сирски рече дека Русија оваа година планирала целосно да ги оствари целите на таканаречената „специјална воена операција“, но дека тие планови пропаднале.
„Плановите беа грандиозни. Но денес можеме да констатираме дека не се остварија, дека беа осуетени. Непријателот претрпе огромни загуби“, рече Сирски.
Тој оцени дека структурата на војната се променила и дека конфликтот влегол во нова, значително понапредна технолошка фаза.
„Војна на дронови и проблеми со руската мобилизација“
„Гледаме промена во структурата на војната и нејзин премин на повисоко технолошко ниво. Војната стана толку технолошки напредна што дроновите од сите видови сега доминираат на бојното поле. Нивната бројност и квалитет значително се зголемија“, изјави врховниот командант на украинската армија.
Сирски наведе дека Русија не успеала да ги реализира сопствените планови за проширување на вооружените сили.
„Русите оваа година планираа да формираат 14 нови дивизии. Успеаја да формираат само седум, при што две марински дивизии имаа само по еден полк. Тие беа принудени да земат човечки ресурси од тие дивизии и да ги прераспределат во борбени единици“, рече тој.
Според неговите зборови, ова јасно покажува дека Русија има сериозни проблеми со пополнувањето на армијата.
„Веќе не сме тие што молат – сега другите доаѓаат кај нас“
Сирски истакна дека се променил и односот на западните сојузници кон украинската војска. Тој наведе дека неодамна се сретнал со началникот на одбранбениот штаб на Обединетото Кралство и со началникот на Генералштабот на Франција.
„Векторот се промени. Сега од нас се бара да помогнеме во обуката на нивните армии и нивните единици. Сметам дека тоа е најголемото признание – кога повеќе не ние молиме, туку другите ни се обраќаат“, изјави Сирски.
Тој додаде дека му било кажано оти украинските вооружени сили се „први во Европа, а веројатно и во светот“ според стекнатото борбено искуство.
На крајот, Сирски нагласи дека основната задача на украинските вооружени сили останува непроменета.
„Мисијата на нашите вооружени сили е иста: да ја браниме нашата татковина, нејзината територија и граници и да го уништиме непријателот“, изјави врховниот командант на украинската армија во интервју за Канал 24.
