Одморот на плажите на Бали би можел да поскапи бидејќи официјалните лица предлагаат нова туристичка такса чија цел е да се справи со предизвиците на прекумерниот туризам. Властите размислуваат за дневен данок за посетителите на Бали, кој би бил сличен на таксата за одржлив развој на Бутан, која на повеќето меѓународни патници им наплаќа 100 долари (95 евра) дневно.
Предложениот систем би можел да го ограничи бројот на посетители и да поттикне поодговорен туризам, следејќи ги моделите што ги користат дестинациите кои го регулираат туризмот за заштита на културните и еколошките добра, пренесува „Travelandtourworld“. Балансирање на растот на туризмот со одржливоста Бали, познат како „Островот на боговите“, продолжува да биде врвна глобална туристичка дестинација, привлекувајќи милиони со своите неверојатни плажи, живописна култура и луксуз.
Сепак, брзиот раст на туризмот доведе до загриженост. Оваа загриженост не се однесува само на прекумерниот сообраќај, туку и на однесувањето на туристите, што понекогаш не е баш за пофалба. И покрај тоа што туризмот придонесе над 60 проценти во економијата на Бали во 2019 година, локалното расположение кон масовниот туризам се промени. Многу жители сега се залагаат за политики кои обезбедуваат одржлив развој, го штитат наследството на островот и одржуваат рамнотежа помеѓу економските придобивки и квалитетот на живот.
Предложената такса се очекува да помогне во регулирањето на приливот на туристи, да промовира одговорно патување и да го зачува уникатниот шарм на Бали за идните генерации.
