Според новиот министер за внатрешни работи на Франција, Лоран Њуњез, крадците биле „професионалци кои знаеле точно што бараат“. Тие користеле камион со подигнувачка платформа, сличен на оние за преселби, се качиле до првиот кат и со сечење на прозорецот со дискова пила влегле во музејот. Целиот упад траел помалку од седум минути.
Внатре, насочиле кон две изложбени витрини во кои се чувале делови од крунските накити на Франција – дијадеми, брошеви, ѓердани и обетки кои припаѓале на императрицата Мари-Луиз, кралицата Ортанс од Холандија, кралицата Мари-Амели и императрицата Евгенија, сопруга на Наполеон III.
Иако дел од предметите биле од XIX век, нивната историска и културна вредност е немерлива. На местото на настанот била оставена круната на императрицата Евгенија, која сега се испитува за евентуални оштетувања.
Министерството за култура соопшти дека алармите се активирале правилно, а петмина вработени кои биле во галеријата или во нејзина близина го следеле протоколот и ги евакуирале посетителите. Еден од нив дури спречил обид на крадците да го запалат возилото при бегството.
Според првичните информации, украдени се осум предмети, а истражителите стравуваат дека накитот ќе биде брзо растопен или препродаден на црниот пазар. Како и во претходни случаи, криминалните групи избегнуваат да крадат славни слики, кои не можат да се продадат, и се насочуваат кон вредни предмети што можат да се претворат во готовина.
Француските власти веќе беа предупредени за растечката смелост на овие банди. Во септември беа извршени две слични кражби — злато од Природонаучниот музеј во Париз, вредно 600.000 евра, и порцелан од музејот во Лимож, вреден шест милиони евра.
„Свесни сме дека француските музеи се ранливи“, изјави министерот Њуњез, додавајќи дека нов план за зајакнување на безбедноста веќе се применува низ целата земја.
Лувр, кој е дом на илјадници ремек-дела, во својата 230-годишна историја имал малку кражби – последната позната исчезната слика е Патот до Севр на Камил Коро, украдена во 1998 година. Но овој случај, кој потсетува на легендарната кражба на Мона Лиза, повторно ја става под прашање безбедноста на најпознатиот музеј на светот.
Француската полиција ги прегледува снимките од надзорните камери и трага по сторителите, но аналитичарите предупредуваат: доколку накитот веќе е распродаден или растопен, шансите за негова обнова се мали.
Извор: BBC
