Денеска, понеделник 2 февруари, Германија е зафатена од голем штрајк во јавниот превоз, откако синдикатот Verdi повика на 24-часовна обустава на работа во комуналните претпријатија за локален транспорт.
Патниците кои користат автобуси, трамваи и подземна железница треба да се подготват за масовни доцнења и целосни откажувања во бројни германски градови, јавуваат германските медиуми.
Штрајкот се одржува во рамки на тековните колективни преговори на национално ниво, а според најавите, во погодените претпријатија сообраќајот може целосно да запре.
Кои региони се погодени?
Обустaвата на работа ќе се одржи во сите сојузни покраини, освен Долна Саксонија, каде што сè уште е на сила обврската за социјален мир, што законски го исклучува правото на штрајк.
Штрајкот опфаќа околу 150 транспортни претпријатија, меѓу кои:
- MVG во Минхен
- BVG во Берлин
- Hamburger Hochbahn и VHH во Хамбург
Синдикатот преговара во име на речиси 100.000 вработени во локалниот јавен превоз и бара подобри услови за работа, пократка работна недела и сменски распоред, подолги периоди за одмор и повисоки додатоци за ноќна и викенд работа
Во одделни покраини, како Баварија, Бранденбург, Сарланд и Тирингија, дополнително се преговара и за зголемување на платите.
Што не е опфатено со штрајкот?
Германската железница Deutsche Bahn соопшти дека возовите ќе сообраќаат без ограничувања.
Штрајкот не ги опфаќа: S-Bahn линиите во Берлин, Хамбург, Минхен, Штутгарт, Келн, Нирнберг и регионот Рајн-Мајн и регионалниот и меѓуградскиот железнички сообраќај
Апел до возачите
Возачите на автомобили се советуваат да планираат повеќе време за патување и, доколку е можно, да ги прилагодат маршрутите. Се очекуваат сообраќајни застои и гужви, особено во утринските и попладневните шпиц-термини.
Како алтернатива на јавниот превоз се препорачуваат: изнајмување автомобили, велосипеди и електрични тротинети
Дополнителни штрајкови
Паралелно со ова, синдикатот Verdi најави и предупредувачки штрајк на вработени во службите за одржување на патиштата во југоисточниот дел на Долна Саксонија. Засегнати се регионите Волфенбител, Гослар и Гандерсхајм, каде што се очекуваат ограничувања во зимското одржување и затворени тунели. Овој штрајк ќе трае од 2 до 4 февруари.
