Повеќе од две третини од Украинците – односно 69% – сакаат војната да заврши со преговори што е можно поскоро, покажува ново истражување на американскиот институт Галуп, спроведено од 1 до 14 јули 2025 година.
Драматичен пресврт во јавното мислење
Ова е голема промена во однос на 2022 година, кога само 22% биле за преговори, додека дури 73% се залагале за продолжување на борбите сè до целосна победа над Русија.
Денес, само 24% од Украинците поддржуваат продолжување на војната сè додека Русија не биде целосно поразена.
Малку надеж за скорошен крај на војната
И покрај зголемената желба за преговори, мнозинството граѓани не веруваат дека војната ќе заврши наскоро. Само 25% мислат дека постои реална шанса активната фаза да заврши во следната година, а само 5% веруваат дека тоа е „многу веројатно“. Цели 68% сметаат дека крајот на борбите во следните 12 месеци е малку веројатен.
Голем пад на довербата во САД
Истражувањето покажува и остар пад на довербата во американското водство. Додека во 2022 година 66% од Украинците имале доверба во САД, денес тоа го мислат само 16%. Дури 73% изразиле негативен став – највисока бројка досега.
Овој пад се совпадна со враќањето на Доналд Трамп како претседател на САД во јануари 2025. Тензиите пораснаа по неговата средба со Зеленски, кога привремено беше замрзната американската воена помош за Украина.
Намалена доверба и во Зеленски
Галуп забележал и пад на довербата во претседателот Володимир Зеленски – од 65% во јуни, на 58% во јули. Причината, според истражувањето, делумно лежи во контроверзниот закон 12414, со кој надзорот над антикорупциските институции бил префрлен под државното обвинителство.
Иако Зеленски го повлече законот на 31 јули по јавен притисок и протести, тоа се случи по завршувањето на истражувањето.
Во моментов, 35% од Украинците изјавиле дека немаат доверба во претседателот – зголемување од 5% во однос на јуни. Вкупната рамнотежа на доверба опаднала од +35% на +23%.
Сепак, и покрај падот, довербата во Зеленски е повисока отколку во декември 2024 – кога била на најниско ниво од почетокот на руската инвазија.
