Семејствата на патниците во малезискиот авион што исчезна пред точно 12 години, денес ја повикаа владата во Куала Лумпур да го продолжи договорот со компанијата „Оушн Инфинити“ и да продолжи со потрагата по остатоците во Јужниот Индиски Океан.
Боингот 777 на „Малезија ерлајнс“, на летот MH370, исчезна на 8 март 2014 година додека леташе од Куала Лумпур до Пекинг. Во него имало 227 патници и 12 членови на екипажот. И покрај бројните операции за пребарување што следеа, остатоците од авионот до ден-денес не се пронајдени, а судбината на сите 239 лица останува непозната.
Пребарување кое не даде резултати
Малезиското биро за истрага на воздушни несреќи (AAIB) денес соопшти дека и најновите операции не дале никакви наоди. Двете фази од пребарувањето траеле вкупно 28 дена и опфатиле околу 7.571 квадратни километри од морското дно. Операциите биле прекинати неколку пати поради неповолни временски услови, а втората фаза официјално завршила на 23 јануари.
Малезија потпиша договор „без пронаоѓање, без надомест“ со „Оушн Инфинити“ во март минатата година. На компанијата ќе ѝ бидат исплатени 70 милиони долари само ако успешно го лоцира бродот. Овој модел на финансирање е невообичаен во индустријата и ја одразува претпазливоста на малезиската влада по неколку скапи и неуспешни операции во претходните години.
Зимските услови го загрозуваат продолжувањето на мисијата
„Voice370“, група што ги претставува семејствата на жртвите, предупреди дека „Оушн Инфинити“ веројатно нема да започне нова фаза од пребарувањето пред да истече договорот во јуни, наведувајќи ги претстојните зимски месеци на јужната хемисфера, кои носат сурови морски услови и ги прават подводните операции исклучително тешки или невозможни.
Затоа групата ја повика владата да одобри какво било барање од компанијата за продолжување на договорот, но и да отвори потрага по други заинтересирани компании кои евентуално би можеле да ја продолжат мисијата.
