Македонскиот режисер и сценарист Гоце Цветановски е добитник на специјална награда за придонес во филмската уметност и индустрија на 19. издание на Српскиот фестивал за фантастични филмови, еден од најзначајните регионални фестивали посветени на жанровскиот и авторскиот филм.
Свеченото отворање на фестивалот се одржа во Културниот центар во Белград, во присуство на бројни филмски автори, професионалци и љубители на фантастичниот филм. На настанот присуствуваше и директорот на Македонскиот културно-информативен центар во Белград, Васко Шутаров, што уште еднаш ја потврди институционалната поддршка за македонските автори на регионалната сцена.
Наградата на Цветановски му беше врачена по проекцијата на оскаровецот „Поплава“, по што следеше панел-дискусија посветена на иднината на анимираниот филм во регионот. На панелот, покрај Цветановски, учествуваа и истакнатите автори Растко и Ивана Чириќ, Никола Мајдак и Алекса Гајиќ, кои разговараа за предизвиците, новите технологии и можностите за регионална соработка во современата анимација.
При примањето на наградата, Цветановски се осврна на своите почетоци и личната поврзаност со фестивалот: „Мојата прва награда во кариерата ја добив токму на овој фестивал, за краткиот игран филм ‘Мал дисконтинуитет во време-просторот’ во 2014 година. Затоа ова признание за мене носи особена емоционална и професионална вредност.“
Ова признание претставува вреднување на долгогодишната авторска работа на Цветановски, како и на неговиот континуиран придонес во развојот на современиот филм, со особен фокус на фантастичниот и анимираниот жанр, кои сè повеќе добиваат значајно место во регионалната и европската кинематографија.
