Друштвените игри во последните години добиваат се поголема популарност, не само кај младите, туку и меѓу сите генерации. Во разговор со Владимир Трајчевски, еден од сопствениците на Гоблин друштвени игри, дознавме како тие успеале да ги освојат срцата на многу љубители на игри, независно од нивната возраст.
Владимир истакнува дека додека во почетокот главни муштерии биле млади луѓе на возраст од 17 до 25 години, денес, демографијата на купувачи е многу поширока. „Генерации од сите возрасти сега се заинтересирани за друштвените игри. Имаме постари лица, млади, па и деца, што е одличен показател дека друштвените игри не се само за некоја специфична возраст, туку за секого“, додава тој.
Кога станува збор за најпопуларните игри, Владимир ги издвои Catan и Ticket to Ride како едни од најпопуларните, но не ги заборави и вечните класики како Монопол и Ризико. Овие игри не само што нудат забавни моменти, туку и развиваат важни когнитивни вештини, како логика, моторика и стратегиско размислување.
„Играњето друштвени игри е многу повеќе од забавување. Тоа е одличен начин за развој на важни вештини. Некои агенти на ЦИА, на пример, играат друштвени игри за да развијат дедуктивно размислување, што е клучно во нивната професија“, вели Владимир.
Владимир го истакнува и значењето на овие игри за младите. „Особено за детскиот развој, друштвените игри се одлични за развој на моторичките и логичките вештини. Игри како овие исто така ги тераат децата да се тргнат од екрани и да се фокусираат на директна интеракција со другите“, вели тој.
За време на нашето снимање во продавницата, на моменти имаше голем број на луѓе, што, според Владимир, е доказ дека и покрај растечката зависност од телефоните, постои вистинска заинтересираност за друштвените игри. „Луѓето сè повеќе се враќаат на старите добри игри и поминуваат време со пријателите и семејството, што е убаво да се види“, додава тој.
Како најголем успех на Гоблин, Владимир го издвои фактот што компанијата има преведено повеќе од 30 друштвени игри на македонски јазик. Овој подвиг претставува голем успех за нашата земја, која не е многу позната по културата на друштвени игри. „За нас е многу важно да понудиме игри на македонски јазик и да ја донесеме оваа култура на друштвени игри поблиску до нашето општество“, додава тој.
Гоблин друштвени игри не само што продолжуваат да ги задоволуваат своите верни купувачи, туку и активно се грижат за развојот на културата на играње во Македонија, што ќе остави траен печат на идните генерации.
