Германската влада мора итно да интервенира и да им помогне на превозниците за да се спречат нарушувања во синџирите на снабдување и пренесување на зголемените трошоци врз потрошувачите, предупредува Сојузот на германски шпедитери (BGL).
Цената на дизелот пораснала за околу 40 центи по литар од почетокот на војната во Иран, истакна претседателот на здружението, Дирк Енгелхардт.
За типичен камион кој месечно минува околу 10.000 километри, со просечна потрошувачка од 30 литри на 100 километри, тоа значи дополнителен трошок од приближно 1200 евра месечно. Кај поголемите камиони, со потрошувачка од 35 до 40 литри, трошоците се уште повисоки.
Огромен финансиски притисок
На ниво на возен парк од 50 возила, годишниот дополнителен трошок надминува 700.000 евра.
„Очекувано е овој притисок порано или подоцна да се пренесе на потрошувачките цени“, предупреди Енгелхардт.
Затоа, BGL ја повикува германската влада да преземе итни и конкретни мерки за да обезбеди ликвидност на компаниите и стабилност на синџирите на снабдување.
Најпогодени малите компании
Особено изложени на ризик се малите и средни транспортни компании, кои често немаат механизми за заштита од вакви ценовни шокови.
Здружението предлага ограничување на цената на дизелот, враќање на CO₂ давачките за гориво и привремено укинување на CO₂ компонентата во патарините за камиони
Според нив, мерките мора да бидат едноставни и брзо применливи за да имаат ефект.
Ограничени заштитни механизми
Многу компании се обидуваат да се заштитат преку договорни клаузули кои дозволуваат прилагодување на цените на транспортот според цената на горивото.
Но, овие механизми често доцнат и не можат целосно да ги ублажат наглите пазарни шокови.
