Безбедносните специјалисти недостасуваат во девет од десет германски организации. Во време на хибридни напади, експертите сметаат дека ова е сериозна закана.
Германија се соочува со голем недостиг на стручњаци за сајбер-безбедност, со рекордни штети од 202,4 милијарди евра во 2024 година поради сајбернапади, покажува студија на Strategy&, глобална деловна единица на PwC.
Девет од десет анкетирани организации пријавиле недостиг на специјалисти, што е голем раст во однос на две третини во 2023 година.
„Само минатата година, германската контрола на воздушен сообраќај, Сојузниот завод за статистика и Друштвото за источноевропски студии беа цел на сајбернапади од странство“, изјави Лукас Сy, партнер во Strategy& Германија и автор на студијата.
„Ако сакаме да ја обезбедиме дигиталната отпорност на Германија, мора да дејствуваме веднаш и да ги искористиме сите можности.“
Според Синан Селен, претседател на Сојузната служба за заштита на Уставот (BfV), Русија и Кина претставуваат особено голема закана. „Германија со години е цел на руски актери, со сè поголем интензитет“, рече тој.
Според дигиталната асоцијација Bitkom, сајбернападите предизвикале вкупна штета од 267 милијарди евра на германските организации во 2024 година. Од тој износ, околу 179 милијарди евра се директно од сајбернапади, а остатокот од кражби на податоци и ИТ-опрема, како и од аналогна и дигитална шпионажа и саботажа.
Во меѓувреме, само половина од огласите за работни места за експерти за сајбер-безбедност во јавниот сектор привлекле повеќе од 10 пријави по позиција, покажува студијата. Повеќе од една четвртина од организациите пријавиле пад на бројот на апликации.
Над две третини од организациите рекле дека кандидатите делумно или воопшто не ги исполнуваат барањата. Често недостигаат знаења за стандарди на сајбер-безбедност или за заштита на лични податоци.
Најголем ризик — управување со ризици
Најсериозниот недостиг е во критичните безбедносни улоги како управување со ризици: 57% од испитаниците изјавиле дека најголемиот јаз е токму во позициите кои треба да откријат или да одговорат на сајбернапади.
Финансиските ограничувања, исто така, го попречуваат вработувањето: 78% од јавните институции ги навеле финансиските причини како главен фактор за откажување од кандидати, наспроти 48% во приватниот сектор. Ниска или неконкурентна плата е најзначајниот фактор за одлив на кадар.
„Ситуацијата во јавниот сектор е особено критична“, рече Sy. „Експертите што итно ни се потребни честопати преминуваат во технолошките компании каде што платите се далеку повисоки.“
Само околу 20% од организациите стратешки користат вештачка интелигенција за да го ублажат недостигот на кадар, според студијата.
Андреас Ланг, директор во Strategy& Германија, изјави дека бонусите и надоместоците мора да се користат за да се запре одливот кон тех-индустријата.
„Рутинските задачи во сајбер-безбедноста може да се оптимизираат преку аутсорсинг и автоматизација, што ќе ги ослободи високо стручните професионалци,“ рече Ланг.
Sy предупреди дека без мерки како што се таргетирани бонуси, подобро платни нивоа или меѓународно регрутирање, тесните грла во критичните безбедносни области ќе продолжат.
„Ако државата не ја зајакне својата сајбер-експертиза, во најлош случај ќе биде загрозена способноста на цели институции да функционираат,“ додаде Ланг, „а со тоа и дигиталната отпорност на Германија.“
