Германија ќе ја засили својата поддршка за одбраната на Украина преку план од 10 точки кој вклучува заеднички инвестиции, понатамошна интеграција на пазарите и можни федерални гаранции за инвестиции. Планот беше претставен за време на вчерашната посета на украинскиот претседател Володимир Зеленски на Берлин, во момент кога европските лидери настојуваат да испратат силна порака за европското единство во поддршката на Украина до американскиот претседател Доналд Трамп, пренесува Reuters.
„Силна украинска одбранбена индустрија е клучна за одбрана од руската агресорска војна и важен елемент на безбедносните гаранции за одвраќање на идна руска агресија“, се наведува во документот споделен за време на посетата на Зеленски, која следеше по продолжувањето на мировните разговори со американски изасланици.
Зајакнување на одбранбената соработка
Според новиот план, Германија и Украина ќе ја продлабочат соработката во областа на одбранбените истражувања, заедничките вложувања и јавните набавки. Како најголем европски поддржувач на Украина, Германија разгледува и можност за користење федерални гаранции со цел да се поттикнат инвестиции во украинската одбранбена индустрија.
Конкретни чекори и иницијативи
Планот предвидува и разгледување на заедничка набавка на одбранбена опрема произведена во Украина, особено дронови-пресретнувачи за заштита на воздушниот простор на НАТО во рамки на Европската иницијатива „Небесен штит“.
За зајакнување на индустриските врски, во Берлин ќе биде отворен канцелариски центар за украинската одбранбена индустрија под името Ukraine Freedom House. Министерствата за одбрана на двете земји ќе одржуваат редовни консултации на високо ниво, Германија ќе го зголеми присуството на своите воени аташеа во Киев и ќе ја интензивира размената на експерти.
Во документот се наведува и дека Германија и Украина ќе преземат сеопфатни мерки за спречување на корупцијата. Ова доаѓа како одговор на загриженоста на Западот по најголемиот корупциски скандал во Киев за време на војната, кој доведе до оставки на двајца министри и шефот на кабинетот на претседателот Зеленски.
