Новите податоци укажуваат дека оваа година може да биде постигнат нов рекорд во бројот на фирми што банкротираат. Привредната и индустриска комора повторно предупреди на потреба од политички реформи.
Бројот на фирми кои поднесуваат барања за редовен стечај во септември порасна за 10,4 % во споредба со истиот месец лани, објави Федералниот завод за статистика врз основа на претходни податоци. Во однос на август, кога растот изнесуваше 11,6 %, зголемувањето е благо побавно.
Судовите кои ќе донесат одлуки за отворање на стечајните процедури сè уште не ги разгледале сите случаи — поднесувањата се регистрираат обично три месеци пред да се отворат официјално. Според податоци за јули, иницирани се стечајни постапки за 2.197 компании — за 13,4 % повеќе отколку година претходно. Побарувањата на доверителите од тие стечаја достигнаа околу 3,7 милијарди евра, во споредба со 3,2 милијарди евра во јули 2024 година.
Најсилно погодени се компании од секторот транспорт и складирање. Привредната и индустриска комора (DIHK) очекува дека бројот на банкроти ќе надмине 22.000 фирми во 2025 година — повеќе од 21.812 случаја во 2024 година, што беше највисокиот број од 2015 година.
Главниот аналитичар на DIHK, Фолкер Трајер, предупреди дека слабоста во извозот, опаѓањето на индустриското производство и лошата конјунктура не даваат добри знаци за германската економија. Тој апелираше до политичарите да спроведат реформи за намалување на трошоците за енергија и труд, како и да се ублажи даночното и бирократското оптоварување.
Од здружението на стечајни управители и доверители (VID) предупредија дека бирократијата сама по себе не е главната причина за банкротите — но може да ја забрза кризата кога фирмите веќе се соочуваат со недостиг на ликвидност, нефлексибилност или грешки во стратегијата.
Во третиот квартал од 2025 година, 4.478 претпријатија беа предмет на стечајни постапки — само 1 % помалку од рекордните бројки од вториот квартал. Штефен Милер, раководител на истражување за несолвентности во Институтот IWH, ја припишува високата стапка на банкроти на долгиот ефект од ниските каматни стапки и државните интервенции за време на пандемијата. Тој предвидува дека бројот на стечаји може да се консолидира на високо ниво, но дека растот нема да се запре целосно.
