Германските трговски синџири повлекоа од продажба повеќе играчки полнети со песок поради сомнеж за присуство на азбест, објави порталот за безбедност на потрошувачки производи Lebensmittelwarnung.
Меѓу повлечените производи е и растегливата фигуричка PUFFERZ Puffer-Figur Sand, пренесува агенцијата dpa. Според предупредувањето, доколку играчката е оштетена или искината, полнењето може да истече и да претставува здравствен ризик при вдишување. Потрошувачите се повикуваат веднаш да престанат да ја користат и да ја вратат во продавниците.
Производот бил дистрибуиран преку продавниците на синџирот Smyths Toys и се продавал во повеќе германски покраини. Надлежните институции советуваат играчките веднаш да се тргнат подалеку од деца и да не се користат.
Играчките со баркод 8714627012316 може да се вратат во продавниците, а купувачите ќе добијат поврат на средствата дури и без фискална сметка.
Во меѓувреме, дисконтниот трговец Woolworth исто така повлече од продажба растегливи играчки Jungle Expedition Super Stretch Gorilla и Brainboooom Super Stretch Predator. Компанијата соопшти дека песокот во овие производи можеби е контаминиран со азбест, поради што артиклите се отстранети од сите продажни места.
Експертите предупредуваат дека азбестот може да се појави во форма на фини влакна кои, доколку се вдишат, можат да бидат штетни по здравјето, особено ако играчките се оштетени. Потрошувачите не треба да ги отвораат овие производи ниту да им дозволуваат на децата да си играат со нив. Доколку песокот веќе се расфрлал во затворен простор, се препорачува темелно чистење за да се избегне создавање прашина.
Точниот број на потенцијално контаминирани играчки засега не е познат.
