Министерката за внатрешни работи на Германија, Нанси Фезер, го претстави планот за враќање на бегалците од Сирија кои престојуваат во Германија и најави проверка на нивниот статус.
„Според нашите закони, Бирото за бегалци и миграции ќе го провери заштитниот статус на бегалците од Сирија и ако е потребно, ќе го укине, бидејќи ситуацијата во Сирија се стабилизирала“, изјави министерката Фезер (Социјалдемократска партија на Германија, SPD) за медиумската компанија Funke.
Таа истакна дека по падот на режимот на Башар ал Асад во почетокот на декември постои надеж за мир. „Кога таа надеж ќе стане реалност, многу бегалци ќе можат да се вратат во својата татковина“, додаде Фезер.
Министерката исто така нагласи дека нејзиното министерство, во соработка со Министерството за надворешни работи, работи на создавање јасна слика за безбедносната ситуација во Сирија и дека се дејствува во „тесна соработка“ со европските и меѓународните партнери.
Што предвидува планот?
Планот на германската влада предвидува право на останување во Германија за оние бегалци кои се вработени или се наоѓаат во процес на образование и кои го научиле германскиот јазик и „овде најдоа нов дом“.
Дополнително, планот вклучува програма за оние кои сакаат доброволно да се вратат во Сирија, со проширување на владината програма за помош за доброволни повратници. Оние кои извршиле кривично дело или станале познати на властите како исламисти треба да бидат депортирани во Сирија што е можно поскоро. „Постојат правни можности за тоа и тие се неодамна проширени, а ние ќе ги искористиме кога безбедносната ситуација во Сирија ќе дозволи“, изјави Фезер.
Во Германија моментално живеат околу 975.000 сириски државјани, а околу 300.000 уживаат таканаречена супсидијарна заштита, која не се заснова на индивидуална одлука за заштита, туку врз основа на воената состојба во Сирија и истечува кога ситуацијата во таа земја ќе се промени. Федералниот завод за бегалци и миграции неодамна ја прекина обработката на барањата за азил од лица кои доаѓаат од Сирија.
Дискусијата за статусот на сириските бегалци станува се позначајна тема во предизборната кампања за предвремените парламентарни избори кои ќе се одржат кон крајот на февруари, при што партиите најчесто бараат што побрзо враќање на бегалците кои не се интегрирани на пазарот на труд.
