Германската софтверска компанија SAP стана највредна компанија во Европа, преземајќи го првото место од данскиот фармацевтски гигант Ново Нордиск. Нејзината пазарна вредност достигна 342,4 милијарди долари, резултат на зголемениот интерес за вештачка интелигенција (ВИ) и силните перформанси на германскиот берзански пазар.
Акциите на SAP пораснаа за 1,16 проценти само во понеделник, откако скокнаа за повеќе од 40 проценти во изминатата година. Компанијата, која обезбедува решенија за бизнис софтвер – од услуги во облак до управување со трошоци, синџир на снабдување и аналитика – сè повеќе ја користи технологијата на ВИ за дополнително зголемување на приходите.
Аналитичарите во Bank of America неодамна го именуваа SAP за еден од лидерите во софтверската индустрија за 2025 година, предвидувајќи дополнителен раст благодарение на интеграцијата на вештачката интелигенција. Тие веруваат дека транзицијата на компаниите кон услуги во облак е сè уште во тек и ќе продолжи во наредните години.
Минатата година, SAP започна голема реорганизација насочена кон развој на решенија за вештачка интелигенција, која веќе даде резултати – приходите од cloud услугите се зголемија за 25 проценти во 2024 година.
Третата е Louis Vuitton
Извршниот директор на SAP, Кристијан Клајн, рече дека минатата година била „најдобрата во историјата на компанијата“, а вредноста на договорените cloud работни места достигнала 63,3 милијарди евра.
„Имаме огромна база на податоци за бизнис, финансии, човечки ресурси и синџир на снабдување од дури 40.000 клиенти. Тоа е најбогатиот деловен збир на податоци од која било технолошка компанија“, рече Клајн.
Германскиот берзански пазар, исто така, бележи значителен раст – водечкиот индекс DAX скокна за речиси 16 проценти од почетокот на годината, надминувајќи го британскиот FTSE 100 и францускиот CAC 40. Растот на оптимизмот беше поттикнат од голем државен инвестициски пакет насочен кон инфраструктура, климатски проекти и одбрана.
SAP ја презеде водечката улога од Novo Nordisk, компанијата позната по своите лекови за контрола на телесната тежина Ozempic и Wegovy. По период на голема популарност, „Ново Нордиск“ се соочи со посилна конкуренција и скептицизам кај инвеститорите во последните месеци.
На третото место според пазарната вредност е францускиот луксузен гигант LVMH, чии акции паѓаат оваа година поради забавување на побарувачката за луксузни производи.
