Од 16 до 20 јуни, Slano повторно ќе стане место на средба, инспирација и креативен дијалог. Преку филмски разговори, проекции и бројни неформални дружења, фестивалот ќе создаде простор за размена на искуства, идеи, авторски пристапи и соработки.
Учесници на овогодинешните Slano Film Days филмски разговори и работилници се истакнати регионални филмски автори – седум режисери и седум актери – чии дела ја одбележаа изминатата кинематографска година и чии филмови редовно се прикажуваат и наградуваат на најзначајните светски фестивали.
Меѓу нив е и Георги М. Унковски, автор на краткиот филм “Налепница”, кој премиерно беше прикажан на Sundance Film Festival и ја освои наградата за најдобар краток наративен филм на Brooklyn Film Festival.
Неговиот дебитантски долгометражен филм “Диџеј Ахмет” ја имаше својата светска премиера на Sundance, каде што ја освои Наградата на публиката во програмата World Cinema Dramatic Competition, како и Специјалната награда на жирито за креативна визија.
Предавањата и работилниците за актери ќе ги посетуваат седум актери кои се истакнаа со своите улоги во поновите филмски и телевизиски продукции.
Меѓу нив е и Тамара Ристовска која се издвои со улогите во наградуваниот краток филм “Проблемот на Тина”, долгометражниот филм “Мими”, прикажан на Пулскиот филмски фестивал, како и ТВ серијата “Фамилија Марковски”.
Нејзините улоги во значајни регионални и европски продукции ги вклучуваат серијата Costantine’s Crossing и филмовите Return to Silent Hill и Hand of Justice, во кој толкува една од главните улоги. Таа има учествувано на бројни меѓународни фестивали и талент-програми, меѓу кои и Berlinale Talents 2025.
Партнер на овој филмски настан е најзначајниот филмски фестивал во регионот – Сараевскиот филмски фестивал.
