Разрушени резиденции, запалени јавни згради и графити на ѕидовите на парламентот со порака „Од сега тука ќе владее само Генерацијата Z“ го опишуваат новиот бран на револуционерна енергија.
По два дена крвави немири, премиерот КП Шарма Оли поднесе оставка. Според полицијата, најмалку 51 лице загинало, а речиси 1.400 се повредени низ земјата. Протестите започнаа откако владата ги блокираше најпопуларните социјални мрежи, но брзо се претворија во бунт против корупцијата и старите политички елити.
„Може да ни го забранат интернетот, но не можат да ни го забранат правото на улица,“ изјави 24-годишната студентка по право Анџали Шах, сведочејќи како полицијата употребила вистинска муниција против демонстрантите.
Регионален феномен
Непал не е изолиран случај. Во последните години млади предводени од „Генерацијата Z“ ја предизвикуваат политичката статика низ целиот азиски континент:
- Шри Ланка (2022): илјадници демонстранти ја окупираа претседателската палата, принудувајќи го претседателот Раджапакса да избега.
- Бангладеш (2024): студентските протести прераснаа во „Монсунска револуција“, со над илјада жртви, а младите денес веќе формираа сопствена партија.
- Индонезија (2025): откривањето на луксузни бонуси за пратениците предизвика улични протести и пад на министерството за финансии.
Според аналитичарите, заедничките фактори се истите: висока младинска невработеност, хронична корупција и политички елити што со децении ја контролираат власта.
Од улица до власт
Во Непал, бунтот доби конкретен исход – младите активисти успеаја да ја постават поранешната претседателка на Врховниот суд, Сушила Карки, како лидер на преодната влада. Таа веднаш го распушти парламентот и закажа избори за март следната година.
„Ова е генерациски момент. Младите во регионот јасно порачаа дека нема да толерираат корупција и лицемерие. Нивните барања за промена веќе го редефинираат политичкиот пејзаж на Азија,“ оценува Шафкат Мунир од Институтот за мир и безбедност во Бангладеш.
Иако улиците на Катманду денес се мирни, зградите во пепел и свежите гробови сведочат за цената на оваа промена. Но како што вели 25-годишниот демонстрант Јатиш:
„Не верувавме дека ќе срушиме цел режим за два дена. Сега знаеме дека иднината е наша.“
Извор: N1info.rs
