Истрагата за несреќата со фуникуларот во Лисабон, во која загинаа 16 лица во септември, утврди дека причината била неисправен и подстандардeн кабел, кој се скинал непосредно пред уредот да излета од шините и да се забие во зграда.
Според извештајот на Португалското биро за истрага на воздушни и железнички несреќи (GPIAAF), кабелот што ги поврзувал двете кабини не ги исполнувал техничките спецификации на градскиот транспортен оператор CCFL. Дополнителните проверки покажале дека кочниците не биле доволно сигурни за да ја задржат кабината во случај на прекин на кабелот.
Фуникуларот Elevador da Glória, симбол на португалската престолнина од 1885 година, служи како туристичка атракција и врска меѓу центарот и повисоките делови на градот. Несреќата што се случи на 3 септември ја потресе јавноста и отвори сериозни прашања за безбедноста на старите инфраструктурни системи во Лисабон.
Од 16-те загинати, 11 биле странски државјани, меѓу кои тројца од Велика Британија, двајца од Канада, двајца од Јужна Кореја и по еден од Франција, Швајцарија, САД и Украина. Меѓу португалските жртви имало четворица вработени во установа за социјална грижа, чија канцеларија се наоѓала на самиот врв на трасата на фуникуларот.
Истражителите откриле дека возачот на Glória се обидел да ги активира кочниците, но не успеал да ја запре кабината без помошта на системот за противтежа. Целиот инцидент траел само 50 секунди.
Останатите фуникулари во градот моментално се надвор од употреба, а GPIAAF препорача да не бидат повторно активирани додека не се потврди нивната целосна безбедност. Конечниот извештај со препораки се очекува во текот на следната година.
