Министерството за вооружени сили на Франција соопшти дека е успешно изведено првото лансирање на мала, петметарска ракета од системот SyLEx за тестирање нови технологии во многу високата атмосфера и вселената.
Ракетата полетала од полигонот за тестирање ракети на Генералната дирекција за вооружување на Франција (DGA) во Бискарос, на атлантскиот брег на Франција.
Француската компанија „ArianeGroup“, една од главните во Европа за лансирање вселенски летала, одбрана и безбедност, соопшти детали за лансирањето на „сондажната ракета“ од новиот систем за тестирање опрема за време на летот, наречен SyLEx (Système de Lancement d’Expériences – Експериментален систем за лансирање).
„Сондажна ракета“ е вид суборбитална ракета за носење научни инструменти на големи височини за истражување и испитување на работата на уредите.
За разлика од орбиталните ракети, сондажните имаат параболична патека, достигнувајќи височини помеѓу приближно 100 и 1.400 километри пред да се вратат на Земјата во рок од 15 до 20 минути.
Тие се исплатлив начин за проучување на горната атмосфера, спроведување експерименти во микрогравитација и тестирање нови технологии и опрема, особено на височини кои се премногу ниски за сателитите.
Системот SyLEx е развиен за помалку од три години и за првпат ѝ дава на Франција можност за самостојно суборбитално лансирање.
На првиот лет, ракетата SyLEx од пет метри носеше експериментален товар, а може да поддржи широк спектар на задачи, вклучувајќи експерименти за враќање на летала во атмосферата и микрогравитација за цивилна и воена примена.
Компанијата соопшти дека има два модела на сондажни ракети, едностепени и двостепени верзии, надополнети со посебна лансирна рампа.
Со носивост до 600 килограми, новиот систем за лансирање ќе може да достигне височини помеѓу 200 и 400 километри. Во зависност од носивоста и конфигурацијата на мисијата, сондажната ракета SyLEx може одеднаш да понесе опрема за повеќе експерименти.
