Штрајкот е закажан да трае 24 часа – од утринските часови на 18 септември до крајот на 19 септември. Синдикатот, кој претставува околу 60 проценти од сите контролори на летање во Франција, предупредува дека акцијата е резултат на „прекин на дијалогот“ со француската Дирекција за цивилна авијација (DGAC).
Во своето соопштение, SNCTA остро ја критикуваше управата:
„Веќе неколку години, управувањето во контролата на летање е обележано со недоверба, казнени практики и деградирачки методи на менаџмент. Очигледно е дека овој бесплоден дијалог сега блокира секоја перспектива за напредок и реформа,“ стои во нивната изјава.
Штрајкот ќе ги зафати сите аеродроми во Франција, меѓу кои и најголемиот – Париз Шарл де Гол. Дополнителен хаос се очекува и во европскиот воздушен простор, бидејќи многу меѓународни летови минуваат токму преку Франција, вклучувајќи линии кон Велика Британија, Шпанија и Италија.
Иако други синдикати – UNSA-ICNA и USAC-CGT – сè уште немаат одлучено дали ќе се приклучат, само учеството на SNCTA е доволно за да предизвика масовни нарушувања.
Француската Дирекција за цивилна авијација најави дека точните информации за откажувања и доцнења ќе бидат објавени два дена пред почетокот на штрајкот.
Ова не е прв пат Франција да биде парализирана од воздушни штрајкови, но фактот што SNCTA го прескокна јулскиот протест предизвикува стравувања дека септемврискиот ќе биде уште посилен и поразорен за авионскиот сообраќај.
Патниците кои планираат патувања кон или преку Франција во втората половина на септември се предупредуваат да бидат подготвени за можни промени во распоредот и долги одложувања.
Извор: Euronews
