Франција остро ја осуди одлуката на Соединетите Американски Држави да воведат визнa забрана за поранешниот европски комесар Тјери Бретон, оценувајќи дека станува збор за директен удар врз европскиот суверенитет и демократски донесените дигитални правила. Одлуката дополнително го продлабочува трансатлантскиот спор околу прашањата за слободата на изразување и регулацијата на онлајн просторот.
Американската администрација во вторникот воведе визни рестрикции за Бретон, еден од главните архитекти на Актот за дигитални услуги (DSA), како и за уште неколку европски активисти против дезинформации. Вашингтон тврди дека тие биле вклучени во напори за цензурирање на американски социјални платформи и за ограничување на слободата на говор, обвинувања што Брисел и европските влади ги отфрлаат.
Одлуката доаѓа во период на растечки разлики меѓу САД и дел од европските престолнини, не само околу дигиталната регулација, туку и околу одбраната, имиграцијата, трговијата и војната во Украина. Според анализите, токму DSA стана симбол на поширок судир меѓу европскиот пристап кон онлајн безбедноста и американското толкување на слободата на изразување.
DSA има за цел да го направи онлајн просторот побезбеден, со тоа што ги обврзува големите технолошки компании поактивно да се справуваат со нелегална содржина, говор на омраза и материјали поврзани со злоупотреба на деца. Американските власти, пак, тврдат дека ваквите мерки воведуваат „неоправдани ограничувања“ на слободата на говор и дека непропорционално ги таргетираат американските технолошки гиганти и граѓани.
Францускиот министер за надворешни работи Жан-Ноел Баро нагласи дека DSA е усвоен преку демократска постапка и дека „нема екстратериторијално дејство и на никаков начин не ги засега Соединетите Држави“. „Франција силно ја осудува визната рестрикција наметната од САД врз Тјери Бретон и уште четири европски личности. Европските народи се слободни и суверени и не можат да дозволат правилата за нивниот дигитален простор да им бидат наметнати од други“, порача Баро.
И самиот Бретон реагираше остро, оценувајќи ја одлуката како „макартистички лов на вештерки“. Тој потсети дека за DSA гласале 90 отсто од Европскиот парламент и сите 27 земји-членки на ЕУ, додавајќи дека „цензурата не е таму каде што мислат нашите американски пријатели“.
Поддршка за Бретон изрази и неговиот наследник на позицијата еврокомесар за внатрешен пазар, Стефан Сежурне, кој порача дека „ниедна санкција нема да го замолчи суверенитетот на европските народи“. Сежурне ја бранеше регулативата како легитимна и неопходна за заштита на граѓаните во дигиталниот простор.
Меѓу лицата погодени од американската визнa забрана се и Имран Ахмед, извршен директор на Center for Countering Digital Hate, како и Ана-Лена фон Ходенберг и Јозефине Балон од германската организација HateAid, како и Клер Мелфорд, коосновачка на Global Disinformation Index.
Германското Министерство за правда соопшти дека забраните за германските активисти се „неприфатливи“ и дека тие имаат целосна поддршка од владата. „Правилата според кои сакаме да живееме во дигиталниот простор во Германија и Европа не се одлучуваат во Вашингтон“, се наведува во соопштението.
Ова не е прв случај администрацијата на Доналд Трамп да санкционира француски државјанин. Во август, САД воведоа санкции и за француски судија во Меѓународен кривичен суд, поради постапки поврзани со истраги за израелски и американски функционери.
