Во земјата се појави нова народна иницијатива под името „Зелена народна стража“ (ЗНС), со цел да се заштитат природата, здравјето на граѓаните и правата на животните. Групата повикува на обединување на сите храбри луѓе низ земјата во заедничка борба против уништувањето на животната средина и деградацијата на јавниот интерес.
Преку новата страница на социјалните мрежи, иницијаторите ќе споделуваат информации за активностите и борбите на терен, како и за начините на кои секој граѓанин може да се вклучи и да придонесе за решавање на горливите еколошки и општествени проблеми.
„Дојде време гласот на народот да се слуша сѐ погласно! Затоа сите да кажеме – доста беше уништување на Македонија!“, порачуваат од ЗНС.
Меѓу главните цели на иницијативата се:
- стопирање на новите рудници и индустриски проекти со штетно влијание врз животната средина,
- заштита на водите, воздухот и шумите,
- спречување на урбанистички уништувања и сечење на зеленилото,
- грижа за здравјето на граѓаните,
- подобра и похумана заштита на животните.
Од ЗНС упатуваат благодарност до сите што ја поддржуваат нивната мисија и повикуваат на масовно граѓанско учество: „Само сплотени можеме да донесеме вистински промени низ градовите и селата на Македонија.“
За повеќе информации и приклучување кон иницијативата, граѓаните може да ја следат официјалната страница на ЗНС.
