Претседателката на Европската комисија (ЕК), Урсула фон дер Лајен, го осуди насилството врз демонстрантите во Иран и најави нови санкции против членовите на иранскиот режим одговорни за репресијата.
Растечкиот број на жртви во Иран е застрашувачки. Недвосмислено ја осудувам прекумерната употреба на сила и континуираното ограничување на слободата“, напиша Урсула фон дер Лајен на социјалната мрежа X.
Таа најави дека Комисијата наскоро ќе предложи дополнителни санкции поради репресијата врз демонстрантите.
„Во тесна соработка со високата претставничка на Европската Унија за надворешни работи, Каја Калас, брзо ќе бидат предложени дополнителни санкции против одговорните за репресијата“, напиша претседателката на ЕК.
Таа додаде дека ЕУ веќе „целосно“ го вклучила Корпусот на Исламската револуционерна гарда, примарниот огранок на вооружените сили на Иран, во режимот на санкции за кршење на човековите права.
Вчера, претседателката на Комитетот за одбрана на Европскиот парламент, Мари-Агнес Штрак-Цимерман, ја повика ЕУ да ја прогласи Револуционерната гарда на Иран за терористичка група „што е можно поскоро“.
