Финска ќе формира регионален центар за поморски надзор со цел заштита на критичната подводна инфраструктура во Финскиот Залив и поширокиот регион на Балтичкото Море, соопшти денеска Финската гранична стража.
Центарот ќе функционира како заедничка платформа за размена на информации и координација со земјите од Балтичкото Море, како и со институциите на Европската унија, во услови на зголемени безбедносни ризици во регионот.
Одлуката доаѓа откако финската воена разузнавачка служба предупреди дека Русија веројатно ќе продолжи со обиди за оштетување на подводната инфраструктура во Балтичкото Море, вклучително и енергетски и телекомуникациски кабли.
Во извештај објавен на 22 јануари, финските безбедносни служби наведуваат дека Русија и понатаму располага со значителни капацитети за спроведување различни операции преку цивилни и комерцијални бродови во Балтичкото Море. Според проценките, ваквите активности претставуваат долгорочен безбедносен предизвик за регионот.
Финските власти нагласуваат дека зајакнувањето на надзорот и регионалната соработка е неопходно за рано откривање на закани и заштита на критичната инфраструктура, која има клучно значење за енергетската, дигиталната и економската стабилност на Европа.
