Словачкиот премиер Роберт Фицо соопшти дека од денес Словачка ќе ја прекине испораката на електрична енергија за Украина, доколку не биде обновен протокот на нафта преку нафтоводот Дружба
„Од денес, доколку украинската страна ѝ се обрати на Словачка за помош во стабилизација на украинската енергетска мрежа, нема да добие таква помош“, изјави Фицо. Тој додаде дека мерката ќе биде укината веднаш штом транзитот на нафта кон Словачка продолжи.
Напад со дрон и нови тензии
Според украински безбедносен извор, украински дронови погодиле руска пумпна станица која го опслужува клучниот нафтовод „Дружба“, предизвикувајќи пожар на локација повеќе од 1.200 километри од руско-украинската граница.
Овој напад е дел од серијата напади долж трасата, што дополнително ги заострува односите меѓу Украина и нејзините соседи Унгарија и Словачка, кои го обвинија Киев дека се обидува да го блокира снабдувањето со руска нафта за нивните рафинерии.
Испораките на руска нафта кон Унгарија и Словачка се прекинати од 27 јануари, кога Киев соопшти дека руски напад со дрон оштетил опрема на нафтоводот во западна Украина.
Украина зависна од струја од соседите
Електричната енергија од Унгарија и Словачка сочинува околу 70% од украинскиот увоз на струја, што е од клучно значење за земјата. Повеќе од половина од украинското производство на електрична енергија е уништено или сериозно оштетено во руските ракетни напади
Унгарија и Словачка претходно се заканија дека ќе ја прекинат испораката на струја за Украина доколку не се обнови протокот на нафта.
Ситуацијата претставува нов сериозен предизвик за енергетската стабилност во регионот и дополнително ја усложнува геополитичката состојба во услови на речиси четиригодишна војна меѓу Украина и Русија.
