Шестото издание на меѓународниот фестивал за литература и илустрација за деца „Литера“ ќе се одржи од 15 до 18 мај, во Младински културен центар. Со претставување на извонредни илустратори и авторка на книги за деца од Турција, оваа земја ќе биде во фокусот на шестата „Литера“. Во рамките на „Литера“ ќе биде организиран Саем на литература за деца, на кој македонски издавачи ќе ги претстават своите најнови изданија, а ќе организираат и средби со автори и промотивни настани.
„Да се создаде фестивал воопшто не е лесна работа, особено кога си со ограничен буџет, меѓутоа ентузијазмот, креативноста и желбата да создадеме нешто по кое ќе не препознаваат е она што не турка напред и буквално со секој фестивал ние летаме се повисоко и повисоко, како што е и мотото на годинашното издание ‘Летаме заедно’“, вели Софија Семенпеева Трајановска, идеен творец на фесивалот „Литера“.
Меѓународниот фестивал „Литера“ се гордее со портфолиото од успешни изложби што ги организира, привлекувајќи голем број посетители и влијателни гости од целиот свет. Од македонски доајени во илустрацијата, каква што беше изложбата на Кондовски, до многубројните странски илустратори што го посетиле фестивалот, Младен Туниќ, Доминик Вуковиќ и многу други, „Литера“ продолжува да ги поддржува и да ги промовира квалитетната литература и илустрацијата за деца.
