Канадскиот сценарист, поет, музичар и филмски автор Бенџамин Хекман (Benjamin Hackman), го има основано бендот „Холи гасп“ („The Holy Gasp“, www.theholygasp.com) во Торонто во 2011 г., како мултижанровски ансамбл кој се стреми кон создавање ретки и визоионерски проекти, каков што е и најновиот: кусометражниот анимиран филм „Избавени од злотворот“ („Out of the Hands of the Wicked“) – „jужњачки готски мјузикл со кукли“, со оригинална музика од „Холи гасп“. Меѓу повеќето филмови на 19-тото издание на „Астерфест“, селектирани под мотото „Кинореалност ‘24“, овој филм ќе има своја европска премиера, пред европската, македонската и астерфестовската публика. „Избавени од злотворот“ ќе биде прикажан во рамки на програмскиот вечерен блок за кратки филмови, на 2 август, со почеток од 20:30 часот, во Летниот амфитеатар во Струмица. Во ексклузивното интервју за Трн, говори за неговиот филм и за неговата работа во светската кинематографија
![](https://trn.mk/wp-content/uploads/2024/07/poster-izbaveni-od-zlotvorot-1-1024x1024.jpg)
Трн: Ќе имате европска премиера на вашиот краток петминутен филм „Избавени од злотворот“ на 19-тиот интернационален филмски фестивал „Астерфест“ во Струмица, на 2 август, со почеток во 20:30 час. Филмот, исто така, е избран и во официјалната конкуренција на „Астерфест“, каде што веќе две децении се препознаваат и се промовираат иновативни и независни уметници и филмски работници, со фокус кон авторскиот филм. Што значи тоа за вас како автор?
Бенџамин: Тоа, всушност, ми значи многу. Во одреден момент од раѓањето на кинематографијата до денес воведена е угнетувачка естетска конвенција, онаа во која доминираше Холивуд и која успеа да ги убеди несвесните гледачи во киносалите низ западниот свет дека филмовите доаѓаат исклучиво од Холивуд. Што е уште полошо, несреќниот брак помеѓу уметноста и трговијата ја претвори уметноста во измалтретирана жена, а за да ги вратат корпоративните инвестиции, продуцентите го претворија киното во дисциплина на консумеризмот – нешто произведено за профит, без соодветна грижа за профитот на културата како целина, без да се води сметка за добивката за умот, срцето и душата. За волја на вистината, киното може да биде многу, многу повеќе од она што е во моментов. Има простор за бесконечно експериментирање и иновации во уметничката форма, но ние бараме фестивалите каков што е „Астерфест“ да курираат уметнички искуства за јавноста и да помогнат гледачите на филмови да се изложат на нови начини на естетска слобода и изразување. Филмските фестивали како „Астерфест“ нè потсетуваат дека киното е многу повеќе од она во што нè наведоа да веруваме и дека највисоките достигнувања во уметничката форма допрва доаѓаат.
![](https://trn.mk/wp-content/uploads/2024/07/benjamin-hackman-4.jpg)
Трн: Од каде е инспирацијата за снимање на овој краток филм, кој го работевте во коавторство со режисерот Лук Сарџент? Од каде произлегуваат приказната и сценариото?
Бенџамин: Како и сè што е произведено од „Светиот здив“ („The Holy Gasp“), започнува со песна, поточно со ред-два текст и мелодија. Стихот „Ѓаволот не може да те повреди затоа што го заклучив во моето срце“ ми се појави во главата едно утро додека се туширав, а неговата перверзност ме замислуваше доволно долго за да изградам музичка нумера со повик и одговор од него. Откако текстот и мелодиите се комплетираа, јас и мојот соработник Ентони Вилијам Валас заедно го компониравме и аранжиравме мјузиклот и го снимивме делот за третиот студиски албум на „Светиот здив“ – „…И Господ го одзеде“ („And the Lord Hath Taken Away“).
Визуелно, со режисерот Лук Сарџент го имавме на ум „Грозјето на гневот“ („The Grapes of Wrath“) на Џон Форд како наша примарна визуелна референца за филмот, како и сцените од Канзас во „Волшебникот од Оз“ и сликите од архивата на „Убиени негативци“ („Killed Negatives“), кои произлегоа од фотографската иницијатива на Рој Е. Страјкер за Одделот за информации на Агенцијата за безбедност на фарми во Соединетите Држави. Овие слики се покажаа како исклучително вредни за дизајнот на гардеробата и сетот за „Избавени од злотворот“.
![](https://trn.mk/wp-content/uploads/2024/07/benjamin-hackman-2-1024x683.jpeg)
Трн: Кажете ни нешто за процесот на работа, колку време работевте на овој филмски проект и кои техники и стилови ги користевте?
Бенџамин: Текстовите и главните мелодии за проектот ги напишав околу 2018 година, а заедно со Ентони Вилијам Валас ги компониравме и оркестриравме заедно со 17 други композиции за плочата „…И Господ го одзеде“ на „Светиот здив“, која беше создадена без посебен редослед помеѓу 2019 и 2021 година. Музиката и вокалот беа снимени во студио во 2022 година и беа објавени на винил и стриминг платформите од страна на „Roar Records“ во април 2023 година, кога и го адаптирав текстот во сценарио, а со режисерот Лук Сарџент почнавме да ги нарачуваме фазите за дизајнирање на куклите и сетот. Претпродукцијата започна во летото 2023 година, а целиот филм го снимавме во текот на еден ден во есента 2023 година. Така што, како што може да видите, за толку мал филм неговите многубројни елементи траеја многу долго, но кога не создавате уметност за профит, туку заради среќата што произлегува од креативноста и соработката, задоволство е да се оди пополека.
![](https://trn.mk/wp-content/uploads/2024/07/izbaveni-od-zlotvorot-kadar-od-filmot.jpg)
Трн: Би било интересно да ни ја објасните техниката на анимација и музичкиот дел/изведбата.
Бенџамин: Филмот се снимаше целосно во живо и изведен е со помош на вистински кукли, изработени по нарачка, дизајнирани од Кристи Ен Холт специјално за нашата продукција. Куклите се направени претежно од стиропор и хартиена мешавина, а се управувани со систем за влечење на жици, слично како кочница за велосипед. Музиката целосно беше изведена во студио од страна на членовите на „Светиот здив“ за нашиот трет студиски албум „…И Господ го одзеде“, достапен на винил и на сите стриминг платформи преку „Roar Records“.
![](https://trn.mk/wp-content/uploads/2024/07/benjamin-hackman-3.jpg)
Трн: Која е пораката на авторите до публиката?
Бенџамин: Не сум баш поборник на идејата дека приказните треба да имаат пораки или наравоученија. Создавањето на вакви пораки не е дел од мојот процес на пишување. Наместо тоа, ги земам предвид природните последици од изборот на ликовите и неизбежните исходи од конфликтите, а потоа јас, како и мојата публика, можам да размислувам за тематските прашања што се оставени за размислување. Во случајот на „Избавени од злотворот“ ме интересираше семејната одговорност и како некој може да се обиде, без разлика дали ќе успее, да го запре напредувањето на генерациската траума преку затворање на злото. Но се разбира, не може да го спаси своето семејство. Секој мора да се лекува, а злото е можеби нешто што не може да се ограничи, само може да се надмине и да се отстрани.
Трн: Кои се вашите понатамошни планови со овој филмски проект, после „Астерфест“?
Бенџамин: Филмот ќе биде премиерно прикажан во Канада, во официјалната селекција на Меѓународниот филмски фестивал „Реџина“ на крајот на август, а потоа ќе се потрудиме да ја споделиме оваа чудна мала куклена забава со што е можно повеќе публика низ целиот свет.
![](https://trn.mk/wp-content/uploads/2024/07/poster-izbaveni-od-zlotvorot-2-1024x662.jpg)
Интервјуото е направено во соработка со „Астерфест“
Фотографиите се отстапени со љубезност на: The Holy Gasp archive, Cathleen Lundgren, Alex Gray
Линк до трејлерот: https://youtu.be/dLBxtEQYU7E