Германскиот фармацевтски гигант Bayer предупреди дека граѓаните на Европа ќе мора да плаќаат повисоки цени за лекови доколку регионот сака да остане конкурентен и атрактивен за фармацевтските иновации. Според компанијата, моделот во кој американските пациенти преку повисоки цени индиректно ги финансираат глобалните истражувања станува неодржлив
Шефот на фармацевтскиот оддел на Bayer, Штефан Оелрих, изјави дека досегашниот систем во кој САД плаќа повисоки цени за да се финансира развојот на нови терапии станува се помалку одржлив. Тој предупреди дека Европа постепено ќе мора да се прилагоди на повисоки цени ако сака да остане дел од глобалниот иновациски ланец.
Промена на глобалниот пазар на лекови
Компанијата Bayer се соочува со трансформација на своето фармацевтско работење по истекот на патентите за клучни лекови како Xarelto и Eylea. Во исто време, растот се префрла кон САД, каде продажбата на лекови расте побрзо отколку во Европа.
Оелрих предупреди дека Европа ризикува да заостане поради побавен пристап до нови терапии и сложени системи за рефундирање на трошоци. Според него, тоа може да доведе до одложување на пристапот на пациентите до иновативни лекови.
Притисок од конкуренцијата и САД
Слични предупредувања пристигнуваат и од други фармацевтски гиганти како Pfizer и Novartis, кои укажуваат дека европските цени и регулативи ја намалуваат конкурентноста. Во исто време, политичари во САД, меѓу кои и поранешниот претседател Доналд Трамп, ја критикуваат разликата во цените меѓу САД и Европа и бараат нивно усогласување
Bayer се обидува да се опорави преку нови лекови како Nubeqa и Kerendia, со надеж за враќање на стабилен раст. Компанијата очекува умерен раст на продажбата, но предупредува дека маржите ќе останат под притисок поради големите инвестиции во нови производи.
Промените на глобалниот пазар, притисокот од САД и ограничувањата во Европа укажуваат на нова фаза во фармацевтската индустрија, каде цената на иновациите сè повеќе ќе се префрла директно на пациентите.
