Но, како што најавија организаторите уште во јуни, ова може да биде последното издание на „Еxit“ во „оваква Србија“, како реакција на политичкиот притисок и ускратената поддршка поради нивната поддршка за студентските протести во земјата.
Фестивалот се отвори со мултидисциплинарниот перформанс „Emergency Exit“, креиран во соработка со познатата шпанска театарска трупа „La Fura dels Baus“. Се работи за импресивен спој на музика, театар, слика, звук и човечка енергија – нешто што, како што велат од трупата, не се гледа, туку се доживува.
Музиката е дело на холандскиот артист Сатори, а визуелниот дел го потпишуваат уметниците од „Eyesberg“, предводени од Хозе Валина. Тој објаснува дека перформансот претставува колективна медитација за патувањето на човештвото на Земјата – прекрасна, но уништена од нашето дејствување. Визуелниот сегмент вклучува еколошки одговорна вештачка интелигенција и реални снимки во живо од изведувачите.
Проектот е поддржан од Европската Унија преку програмата „Креативна Европа“, а по светската премиера на „Еxit“, ќе биде изведен на фестивалот „Boom“ во Португалија (17 јули), потоа на „Sea Star“ во Умаг, и во Барселона следната година.
Што се однесува до музичката програма, овогодишното издание го предводат The Prodigy, DJ Snake и Solomun. Публиката ќе ужива и во Sex Pistols (со нов фронтмен – енергичниот Френк Картер), I Hate Models, техно-метал дуото Paolo Ferrara & Lorenzo Raganzini, како и Боб Гелдоф и The Boomtown Rats, Tiesto, Loreen (двократна победничка на Евровизија), и многу други.
Танц арената ќе биде домаќин на Amelie Lens, Nina Kraviz, Indira Paganotto, Sara Landry, Boris Brejcha и глобалната техно сензација Jusuke Yukimatsu, со посебен акцент на Solomun и неговиот Dynamic Showcase.
Како што вели портпаролката Ана Радовановиќ:
„Exit отсекогаш поврзувал генерации и народи преку музика, креативност и активизам. Но од кога јавно ја поддржавме борбата на студентите, се соочивме со огромни финансиски и други притисоци. Без јавна поддршка, ваков фестивал не може да опстане во Србија, но нема да дозволиме да нè замолчат.“
Затоа, 25. издание на „Еxit“ е активистички чин и симбол на отпор – последен танц на Петроварадинската тврдина, во чест на слободата и музиката.
