Европските лидери Францускиот претседател Емануел Макрон, германскиот канцелар Фридрих Мерц и британскиот премиер Кир Стармер на 10 мај пристигнаа во Киев каде што се сретнаа со украинскиот претседател Володимир Зеленски. На средбата им се придружи и полскиот премиер Доналд Туск, кој во Киев допатува одделно.
Ова е прва официјална посета на канцеларот Мерц на Украина, и првпат сите четворица лидери заеднички престојуваат во Киев од почетокот на војната.
Порака на солидарност и поддршка за мировниот план
Во заедничко соопштение на европските лидери објавено од британската влада се наведува:
„Ние, лидерите на Франција, Германија, Полска и Обединетото Кралство, стоиме во Киев во знак на солидарност со Украина против руската брутална и нелегална инвазија.“
Во документот дополнително се истакнува поддршката за повиците на американскиот претседател Доналд Трамп за мировен договор, како и барањето Русија да престане со попречување на напорите за постигнување траен мир.
Состанок на „коалицијата на подготвените“
Претседателот Макрон потврди дека во текот на посетата ќе се одржи состанок на т.н. „коалиција на подготвените“ – група земји кои ветиле мировни сили и безбедносни гаранции за Украина, во случај на постигнување прекин на огнот. Дел од земјите ќе учествуваат виртуелно, пренесува Guardian.
Посетата доаѓа веднаш по повикот на претседателот Трамп за „безусловен 30-дневен прекин на огнот“ меѓу Русија и Украина. Според Reuters, САД и нивните европски сојузници работат на финализирање на предлогот за тримесечен целосен прекин на огнот.
Украина уште во март изјави дека е подготвена за целосно примирје, доколку и Москва се согласи под истите услови. Русија повеќепати ги отфрли ваквите предлози, барајќи сериозни отстапки од Киев, вклучувајќи прекин на целата странска воена помош.
Извор: Novosti / Kiev Independent
